Read Te B'aib'ara Iobi 27 Bible Online

Iobi 27 - Te B'aib'ara bible

Iobi 27

¹Ao e taku Iobi,

²“I berita n aran te Atua ae m'aaka, ae aki kan kaeta taekau, ao E karaoa maiu b'a e na maai,

³ni karokoa tokin maiu n aron are E a tia ni baaireia,

⁴b'a e na aki manga taekina te buakaka riau, ao e na aki manga taekina te kewe neweu

⁵N na aki manga taekinna b'a kam eti, N na boni kamatoaa ae I aki bure ni karaoan te m'akuri ae buakaka ni karokoa mateu.

⁶E na bon aki b'ara nanou i bukina b'a I bon itiaki.

⁷Ke a bane ni katuaaeaki au kairiribai n aroia aomata aika buakaka, ae akea te raoiroi i rouia, aika aomata ake aki toki ni kakaitaraai b'a kaanga aongkoa te aomata ae i buakaka ngai.

⁸Tera aia kaantaninga aomata aika akea atuaia ngkana e a roko te tai are e a anaaki iai maiuia i roun te Atua?

⁹E bon kona n ongo tangiia te Atua ngkana a reke n te kangaanga?

¹⁰A bon riai ngkoa ni kainanoa te kakukurei are E anga, a riai ngkoa n teimatoa n tataro nako Ina.

¹¹N na reireiniko b'a korakorara m'aakan te Atua; ma ni kab'arab'ara b'a tera te b'ai ae a tia ni baaireia te Atua ae m'aaka.

¹²Ma nooria, kam a bon bane n tia n nooria, ao e aera ngkai kam taetae n te aro ae nanobaba?

¹³Toob'a, aio aron te Atua ni katuaaia aomata aika buakaka, aika iowawa.

¹⁴E ngae ngkana tao a karikiia natiia m'aane aika m'aiti, ma a na bane ni mate n te bo ni buaka; e na aki tau reken te am'arake ae a na kanna natiia.

¹⁵Ao a na manga mate n te aoraki akana a reke maiuia; ao ane a na aki tang naba aine ake a mate buuia.

¹⁶E ngae ngkana tao a tabukirake ana tirewa te aomata ae buakaka n te aro ae aki kona ni warekia, ao a uataorake riki ana kunnikai nako ia aomata,

¹⁷ma ane a na b'ainaki aia kunnikai i rouia aomata aika raoiroi.

¹⁸Kaanga ai aron ngaon Ten Takareau ana auti te aomata ae buakaka ngkana e katei ana auti, ke kaanga ai aron te auti ae uarereke ae ana auti te tia taratarai taian tawaana.

¹⁹Ao n te kabanea n tai, e na wene ma kaub'aina i aon ana kainiwene, ao e na uti, ao e na kunea b'a a mauna nako kaub'aina.

²⁰E na roko i aoia te b'ai ae kakamaaku, kaanga rokon te ieka, ao a na ubara nako n te ang ae oro n te tairiki;

²¹e na iribiia nako te ang mainiku man aia auti;

²²e oroia te ang n aki manga nanoangaia ngke a tabe ni kakaai angaia ni birinako.

²³A na b'ainingareaki i roun te ang n taabo nako i ke a birinako iai, ma ni kakamaakuia ni korakorana n urub'ai.