Read Te B'aib'ara Iobi 28 Bible Online

Iobi 28 - Te B'aib'ara bible

Iobi 28

¹Bon iai taabo ike a taunaki iai taian tirewa. Bon iai taabo ike a manga kaburoaki iai taian koora.

²A keni biiti aomata mai aan te aba, ao a kaburoi ni kanakoi taiani kaab'a man taian atiibu.

³A uoti taian taura aomata n neweabai taabo ni keniken aika rotongitong ake i aan te aba. A ukeuke i kabin te aonnaba, ao a keniken i bukin kakaaean taian atiibu i nanon te rotongitong,

⁴n taabo aika raroanako man te tabo are e maeka te aba iai, ke taabo ike a tuai man roroko iai te aba. A keniken i nanon b'angab'anga aika nano, n taabo aika akea kaaia, a tinetine n roobu i nanon b'angab'anga.

⁵A maiu taian aroka i aon te tano, ma a bane n uruakaki b'aai ni kabane n te ai n are i aan te tano.

⁶A mena taian tabeiro i nanon atiibu, ao taiani koora i nanon bubun te b'a.

⁷Bon akea te aoki ae noora te kawai nakoni nnen taian atiibu aika kakawaki, ao akea naba te ikare te kia ae a tia ni kiba i aoia.

⁸Bon akea naba te raian temanna, ke maan ni kaakang, aika tia n roko ni kawai aika kamaroaa aikai.

⁹A keniken aomata i aon b'a, ao a kunei taian atiibu aika kakawaki.

¹⁰A keni kawaia i nanon taiani b'a, ao a kunei atiibu aika kakaawaki

¹¹A kunei n aia keniken taabo ike a moan raanga mai iai karaanga, ao a karokoa te oota nakon tabo aika karabaaki.

¹²E na reke ia te rabakau; e nga te tabo ae ti na reireiniira iai te ataib'ai?

¹³E aki kona kuneaki te rabakau i rouia aomata; bon akea temanna ae ataa manenana ni koaua.

¹⁴Bon akea i kabin marawa ke i nanon taari.

¹⁵E aki kona ni kabooaki n te tirewa ke te koora.

¹⁶A aki bootau naba ma ngaia te koora ma te tirewa aika rangi n tamaroa.

¹⁷E boongana riki nakon te koora, ke nakon te boora te koora, ke te kiraati ae rangi n tamaroa.

¹⁸E manena riki te rabakau nakon atiibu aika kakaawaki ake a roroo, ma ake a itiaki, ao ake a uraura.

¹⁹E aki bootau naba ma te atiibu ae babobo, are atiibun Itiobia ae kakawaki, ao e aki bootau naba ma te koora ae itiaki.

²⁰Ao e mena ia ngkanne te tabo ike e nako mai iai te rabakau? E nga te tabo ike ti na kona n reirei iai te ataib'ai?

²¹Akea te b'ai teuana ae maiu ae kona ni kunea, e aki kona ni kunea te mannikiba ae kibakiba i eta.

²²E taekinna naba teuare te Mate, ao teuare te kabuanib'ai b'a a ti ongo aaningin rongorongona.

²³Bon ti te Atua ae ataa te kawai, E ataa te tabo ike e mena iai te rabakau,

²⁴i bukina b'a E noora tabon aonnaba, E noori b'aai ni kabane aika i aani karawa.

²⁵Ngke E baairea aron korakoran nenen te ang, ao ni baairea naba m'aitin taian ran i nanon taian nang;

²⁶Ngke E motika ana tai ni b'aka te karau, ma kawain te iti are e na tootoua.

²⁷Ao bon man te tai anne are E baairea iai aron te rabakau b'a tera.

²⁸E taku te Atua nakon te aomata, “Ngkana ko tangiria ni wanawana, ao ko riai n anga te karinerine nakon te UEA. Ngkana ko kan atatai, ao ko na rairaki nako man te buakaka.”