Read Te B'aib'ara Iobi 3 Bible Online

Iobi 3 - Te B'aib'ara bible

Iobi 3

¹Ao n tokina, e a taetae Iobi ni karereantia te bong are bungiaki iai

³Te Atua O, Ko na karereantia te bong are I bungiaki iai; kamaraiaa te bong are e moan taoman iai tinau.

⁴Karika te bong anne b'a te ianroo, te Atua. Tai manga uringa te bong anne, tai manga kaota te oota iai.

⁵Karikia b'a te bong ae rangi n rotongitong, ae uananginang, ae nubono matan taai iai.

⁶Kanakoa mai buakoia tairikin te ririki, ao tai manga oki ni warekia.

⁷Karikia b'a te bong ae kanoabo ae akea te kakukurei i nanona.

⁸Tuangiia taan tabunea b'a a na karereantia te bong anne, koraki ake a ataa aron tauani mwiin te Rib'aietan[7]

⁹Katoka ootan te itoi ni ngaina; karika te tairiki anne b'a te tairiki ae akea kaantaningaan te karangaina iai.

¹⁰Karereantia te tairiki anne i bukina ngke e karika bungiakiu b'a N na noori taiani kanganga ma karawawata.

¹¹I bia kaman mate ngke I a tib'a bungiaki.

¹²Bukin tera ngke e b'ab'akoai tinau? Bukin tera ngke e kammammaai tinau?

¹³Ngke tao arona b'a I a kaman mate, ao N na bon rau raoi n te tai aei,

¹⁴ni matu n ai aroia taian uea ma taan tautaeka ake a manga karaoi bareti ni kawai

¹⁵Ao i mwiina, N na matu n ai aroia taian nati ni uea aine ake a manga kaoni aia bareti n taiani koora ma tirewa.

¹⁶E aera ngke I aki kaman mate ni bungiakiu, ao n taunaki, n aki manga noora otan te ngaina.

¹⁷N aia aonnaba maate, aika buakaka mani kainano a motirawa n akea aia tabeaianga.

¹⁸A bane ni mena aomata ikekei

¹⁹aika taenikai ma tooro, ao a kainaomataaki n tokina.

²⁰Bukin tera ngkai n na maiuakina te maiu ae kangaanga mani kammaraki?

²¹I tataninga te mate ao n tangira riki te rua ni mate nakon te kaub'ai.

²²Bon akea te b'ai ae na kona ni kakukureiai i rarikin te mena n te ruanimate;

²³Bukin tera b'a n na teimatoa ni maiu, ngkai E bon otab'aniniai te Atua? ma I aki kona noora te kawai?

²⁴Kanau ma nimau, bon te tanginiwenei ma te ngirangira,

²⁵ao maaku aika nang buakaka a bane ni koro bukiia.

²⁶Bon akea te rau ma te motirawa i rou bon tii te rawawata ma te raraoma.