Read Te B'aib'ara Iobi 30 Bible Online

Iobi 30 - Te B'aib'ara bible

Iobi 30

¹Ma a b'ainingareai m'aane aika a uarereke riki nako Iu! A teimatoa ngkoa tamaia n akea bonganaia n te aro are I aki kona ni kariaia b'a a na raoniia au kamea ni kaawakiniia tiibu.

²Bon te koraki n aomata ngaiia aika akea manenaia, a rangi ni mamaara ni karaoa te m'akuri teuana i buku.

³A bon rangi ni baki n te aro are a otinako n te tairiki nakon taian rereua ma n tenaruai taiani wakaa ni kai aika m'auteretere.

⁴A taeki arokan te rereua ao a kang, ao a kana naba wakaan te tuniba.

⁵A kakakioaki nako mai buakoia aomata; a takaruaaki ni kanakoaki kaanga aroia taani kimoa.

⁶A mamaeka i nanon taiani b'angani matang, aika b'angab'anga aika kenaki i rarikin b'a aika rietaata.

⁷A kakarongoa n taabo aika buakoako kaanga ai aroia maan, ao a ibetutu i aan te buakoako ae uarereke.

⁸Te koraki n aomata aika akea araia, ao akea mwiia! A kakioaki nako man te aba.

⁹Ao ngkai a roko ni b'ainingareai, ao I riki b'a aia b'ai ni manikangare.

¹⁰A taraai b'a te aomata ae rangi n riribaaki, ao a iangoia b'a a rangi n raoiroi riki nako Iu. Ni karokoa a bon roko ma ni bawarea matau.

¹¹A rairakiai ni bononnanoai i bukina ngke E boni karaoai te Atua b'a N na mamaara ma n akea boonganau.

¹²A katea aia kaeng ni buakanai. A kabirinakoai, ao a katauraoia nakon buakanakiu ma tiringakiu.

¹³A totokoi angan birinakou, ao a kataia ni kamateai; ao bon akea temanna ae katokiia.

¹⁴A urua te nono are I mena iai, ao a biri n taobekaai ngke e a tib'a b'aka atiibun te nono.

¹⁵E taonai te maaku, ao e birinako kakannatou n ai aron te ang, ao e mauna iangoan te tokanikai n ai aron te nang.

¹⁶Ao N nang mate ngkai; bon akea katokan marakiu.

¹⁷A bane ni maraki riiu n te tairiki, e aki kona n toki kainanou n te maraki.

¹⁸E taua au kabaraaki are i kamou te Atua, ao e burimangaoa au kunnikai ni kam'anunuua

¹⁹E kab'akaai rikaaki i nanon te bokaboka, ao I riki b'a te b'ai ae akea manenana kaanga te bubu ni baareka.

²⁰I tang nako Im te Atua, ma Ko aki kaekaekaai, ao ngkana I tataro, ao Ko aki kani kubarai.

²¹Ko karaoa te m'akuri ni iowawa, Ko kabanea korakoram ni b'ainikiriinai.

²²Ko karokoa te ang b'a e na ukai nako, Ko tiribooai n te ang buaka ae korakora.

²³I ataia b'a Ko uotai nakon te mate, nakon te tabo are tokiia aomata ni kabane.

²⁴E aera ngkai Ko a buakana te aomata ae a boni kani mate, ae akea te b'ai ae kona ni karaoia b'a ti te bubuti?

²⁵E koaua b'a I aki tanginiwenei ma aomata n aia kangaanga, ao I aki nanoangaia naba aika kainano?

²⁶I kakantaninga te kukurei ma te oota ngkoa, ma a roko i Rou te kangaanga ma te rotongitong n onea mwiina.

²⁷E a bwenaua rab'atau te raraoma ma te maraki, a aki kona ni bane bongin te maraki nako Iu.

²⁸I tang i buakon te roo, ao bon akea te oota ae na kakukureiai. I tei n tatakaaruaea buokau n taabo aika a m'aiti aomata iai.

²⁹I riki ngai ni b'anaau b'a raoia kameanti ma taian tangiuoua ae tangi ni kananoanga.

³⁰E a beeroro kuniu, ao e a taonai te aoraki ae te biua.

³¹I ongongo ngkoa taian anene aika kakukurei, ma ngkai I a ti ongo kuuna aika kananokawaki.