Read Te B'aib'ara Iobi 34 Bible Online

Iobi 34 - Te B'aib'ara bible

Iobi 34

¹Ao e taku Eriu:

²Boni ngkami aomata aika kam wanawana, ao kakauongo nako Iu!

³Kam ata te am'arake ae kangkang ngkana kam katoongnga, ma kam aki atai taeka n rabakau ngkana kam ongo.

⁴E bon nakoira ataakin te eti ma te raoiroi.

⁵E kamatoa Iobi n taekinna b'a tiaki te tia bure ngaia, ma e bon rawa te Atua ni karaoa te motikitaeka ae eti nako ina.

⁶Ao e taku, “N na kanga ni kewe n taekinna b'a I bure? I a kaani mate ma I bon tuai bure naba.”

⁷Ko a tia n nonora te aomata ae aekakin Iobi? E aki kukubara te Atua.

⁸E tatangiriia raoraona aika aomata aika buakaka, ao e airiiri ma taani bure.

⁹Ao e taku b'a bon akea manenan kakaraoan nanon te Atua.

¹⁰Ongora i Rou ngkami aika taani wanawana! E koaua b'a E kona ni karaoa te b'ai ae kaairua te Atua ae m'aaka?

¹¹E anganiia aomata kaniwangaia n te b'ai are a boni karaoia, ao E karaoa nako ia te b'ai ae bon riai n reke nako ia.

¹²E aki karaoa ae buakaka te Atua ae m'aaka; E aki kona ni karaoa ae aki raoiroi nakon temanna.

¹³E koaua b'a E karekea m'aakana te Atua mai roun temanna? E koaua b'a iai ae anga te aonnaba nakon te Atua b'a E na taua taekana?

¹⁴Ngkana E a manga anaa te ikeike ni maiu te Atua are E a tia n anga,

¹⁵ao a na bane ni mate aika maiu ma ni manga oneaki rab'ataia ni manga okira te tano.

¹⁶Ao ko na ongora i Rou ngkai ngkana ko taku b'a ko wanawana.

¹⁷Ko kabuakaka te Atua ae raoiroi? Ko taku b'a E riba te motikitaeka ae eti?

¹⁸E kabuakakaia uea ma taan tautaeka te Atua ngkana akea uaaia, ke ngkana a buakaka.

¹⁹E aki tei n aia itera taan tautaeka, ke n raoniia riki aomata aika kaub'ai nako ia aika kainano, kioina ngke E bon karikia aomata ni kabane.

²⁰Ti na karina ni mate n te tairiki. E oroira te Atua ao ti mauna nako. E tiringiia aika korakora ao akea Ana kangaanga iai.

²¹E nooria aomata n taabo nako ike a nako iai.

²²Bon akea te rotongitong ae kona ni karaba te tia bure mai roun te Atua.

²³E aki kainanoa te tai teuana te Atua are E na motiki iai taekara.

²⁴E aki tangira te kareke rongorongo ngkana E na kakerikakiia taan kairiiri man aia tabo, ni manga onei mwiia.

²⁵I bukina ngkae E atai baika karaoi, ngaia are E karaanga nakoia, ao E kamanatuaia n te tairiki.

²⁶E oroia tani bure i mataia aomata,

²⁷i bukina ngke aikoa onimakinna, ma n aki tabe ma Ana tua.

²⁸A imanonoia aomata aika kainano b'a a na tang nakon te Atua, ao E ongo b'anaaia ni kan buokiia.

²⁹Ngkana e bon taku te Atua b'a akea te b'ai ae na karaoia, ao akea temanna ae kona n tiribureia. Ngkana E karaba matana, e na aki reke buokaia aomata.

³⁰E na bon akea te b'ai ae a na kona ni karaoia botannaomata n totokoia taan karawawataia aomata ake akea atuaia man aroia n tautaeka i aoia.

³¹Iobi, ko a tia ni kaoti am bure nakon te Atua, ao ni berita b'a ko na aki manga bure riki?

³²Ko a tia ni butiia te Atua b'a E na kaoti am kaairua nako Im? Ao ko a tia ni kariaia b'a ko na katoka te m'akuri ae buakaka?

³³Ko tiriburei baika E karaoi te Atua, ao ko iangoia b'a E na karaoa te b'ai ae ko tangiria? E mena te baaire i roum ao tiaki i Rou; tuangiira ngkai te b'ai ae ko iangoia.

³⁴E na kariaia aei te aomata ae iai ana iango, ao e na taku te aomata ae wanawana ae ongo i Rou

³⁵b'a e taetae n nanobaba Iobi, ao bon akea nanon baika e taekin.

³⁶Iangoi b'aai ni kabane aika e taekin Iobi, ao ane kam na nooria b'a e taetae n aron te aomata ae buakaka.

³⁷E aki ti bure nakon te Atua, ma e katei naba nako Ina; e b'ainingarea te Atua i matara ngaira aikai ni kabane.