Read Te B'aib'ara Iobi 36 Bible Online

Iobi 36 - Te B'aib'ara bible

Iobi 36

¹Ao e reitanako ana taeka Eriu, ao e taku,

²Taotaona nanom, ao ongora riki teutana nakon te b'ai ae I taekinna man Ana itera te Atua.

³E raababa au atatai, ao N na kamanena te b'ai ae I ataia ni katereterea te Atua ae au Tia karikib'ai b'a E bon eti.

⁴Bon akea te b'ai ae bure ae I taekinna nako im, b'a e mena ngkai i matam te aomata ae wanawana raoi.

⁵Ai korakora ra te Atua! Bon akea temanna ae kakeaa bonganana. Bon akea naba te b'ai ae aki ataia.

⁶E aki kateimatoai maiuia taani bure, ao E kaakaraoa te eti nako ia aomata aika kainano.

⁷E kakawakiniia aomata aika raoiroi; E kariaia b'a a na tautaeka b'a kaanga taiani uea, ao E karaoia b'a a na karineaki n aki toki.

⁸Ma ngkana a kabaeaki aomata n taurekereke, a kabureaki man karawawataaki i bukin baika a tia ni karaoi,

⁹ao te Atua, E boni kaota naba nako ia aia bure ma aia kainikatonga.

¹⁰E karaoia b'a a na ongora nakon Ana kauring, b'a a na rairaki nako man te buakaka.

¹¹Ngkana a ongotaeka i roun te Atua ma n toro i Rouna, ao a na kabanei maiuia n te rau ma te tabomoa.

¹²Ma ngkana a aki, ao a na mate i nanon nanobabaia, ao a na ri aon te karaanga nako abaia maate.

¹³A na teimatoa n un nanoia aomata ake akea atuaia, e ngae ngke a katuaaeaki, ao a bon aki kan tataro naba buokaia.

¹⁴A mate ngke a bon ataei, a uruaki rab'ataia ni m'akuri aika buakaka.

¹⁵Ma E reireiniia aomata te Atua i nanon te rawawata, ao E kabongana te maraki i bukin kaureani mataia.

¹⁶E kaotinakoko te Atua man te kangaanga, ao e karekea te rau nako im b'a ko na kukurei iai; E kaona aon am taibora n te am'arake.

¹⁷Ma ngkai, ko a katuaaeaki ni bon uaan mwiin am m'akuri.

¹⁸Taratara raoi b'a ko na aki m'ane n te babaka ni kawai, ke ni kairakinako n taiani kaub'ai.

¹⁹Bon akea uaan takaaruam i bukin buokam; ao korakoram ni kabane a bon aki kona ni buokiko ngkai.

²⁰Tai ienikuriia rokon te tairiki, are te tai are a na mauna nako iai botannaomata.

²¹Tarataraiko b'a ko na aki rairaki nako nakon te buakaka; e karokoaki te rawawata nako im b'a e na kawakiniko mai iai.

²²Ko na uringa korakoran m'aakan te Atua, boni ngaia te kabanea n tia reirei ae korakora i aon b'aai nako.

²³Bon akea temanna ae kona n tuangnga Ana m'akuri, ke ni bukinna ni karaoan te buakaka.

²⁴E neneboaki ni b'aai ni kabane ake E karaoi, ao ko riai naba n neboia.

²⁵A tia aomata ni kabane n noori b'aai ake E a tia ni karaoi; ma ti ara b'ai te mataku mai keraroa.

²⁶Ti aki kona n atai korakorana ni kabane, ke ni wareki m'aitin Ana ririki.

²⁷Bon te Atua ae anaa te ran mai aonteaba, ao E onikia nakon te timtim ni karau.

²⁸E kab'aroa te karau man taian nang, b'a taiani karau nako ia aomata ni kabane.

²⁹Bon akea ae ataa butin taian nang, ke aron rurungaan te baa ri karawa, n te tabo are E maeka iai te Atua.

³⁰E kanakoa te iti i karawa ni kabuta, ma e bon tiku naba kabin marawa n rotongitong.

³¹Ao bon aei arona ni kam'arakeia aomata ma ni kataubobongai am'arake aika rangi ni m'aiti.

³²E taua te iti i nanon baina ake uaai, ao E kanakoa b'a e na orea te tabo are E m'aakenna.

³³E kaota rokon buakan karawa, ao a ataa iai rokon buakan karawa te nanai ni kao.