Read Te B'aib'ara Iobi 40 Bible Online

Iobi 40 - Te B'aib'ara bible

Iobi 40

¹Ko kakaewenakoa te Atua ae m'aaka Iobi; Ko na kab'ara nanom mai iai ngkai, ke ko na kaeka?

³Ao e taku Iobi,

⁴I taetae ni baba te UEA, tera ae N na kona ni kaeka? N na bon aki kataia n taekina riki te b'ai teuana.

⁵E a tia n rianako au taetae ni kawai.

⁶Ao E a manga taetae riki te Atua nakon Iobi mai buakon te angibuaka.

⁷Teirake ngkai ni kaetiko, ao kaekai au titiraki.

⁸Ko kataia ni kakaea te koaua b'a I kakaraoa ae aki eti ko taekinai b'a I kaairua, ao ngkoe ko eti?

⁹E boraoi korakoram ma Ngai? Ko kona ni karebwea b'anaam n ai aron rebwen te baa, kaanga b'anaau?

¹⁰Ngkana e koaua, ao teirake kaota karineam ma kakannatom, ao kunnikaiko n te neboaki ma te mimitong.

¹¹Nooriia aika kamoamoa, kaota unim nako ia b'a aonga ni kananorinanoia.

¹²Eng, taraia, ao uotia rikaaki, kamanatuaia aomata aika buakaka n te tabo are a mena iai.

¹³Tauniia i nanon te tano, kabaeia i abaia maate.

¹⁴Ao boni Ngai te moan neboiko ma ni kakoauako b'a ko bon tokanikai n oin korakoram.

¹⁵Ko na tara te man ae korakora ae I karikia, ao I karikiko naba. E kakana te uteute n ai aron te kao,

¹⁶ma ai tera te korakora are n rab'atana, ma te marurung are i aan rab'atana!

¹⁷E tei n etiruru bukina, ao a marurung iana ake n rangana.

¹⁸A korakora riina n ai aron te biti, ao rangana ai aron te b'a te nari.

¹⁹Boni ngaia te kabanea ni kamimii mai buakoia au karikib'ai! Bon ti teuare E bon karikia ae kona ni kataenikaia.

²⁰A rikirake uteute ake e am'am'arake iai i aon taian tabuki, ike a memena iai maan aika katam'anti.

²¹E wene i aan taiani buakoako aika kateketeke, ao E karaba i buakon uteuten te kaneinei.

²²E kanuua i aan nuun kaai aika kateketeke ma kaai riki tabeua.

²³Bon akea maakuna n te karaanga ae korakora airana, e ngae ngke e namakina korakoran te aira i aon ubuna, ma bon akea naba kubana.

²⁴Antai ae kona ni kamatakiia, ma n taua, ke antai ae kona n rawea b'airina n te b'ai ni kam'ane?