Read Te B'aib'ara Iobi 41 Bible Online

Iobi 41 - Te B'aib'ara bible

Iobi 41

¹Ko kona ni katekea antin Taari ae kamamate n te matau, ke ni kabaea newena n te roobu?

²Ko kona n karina te roobu i nanon b'angab'angan b'airina, ke ni karina te matau i m'angaina?

³E kona ni bubutiiko b'a ko na kainaomata? E kona n ononiiko b'a ko na nanoangaia?

⁴E kona ni karaoa te boraraoi ma ngkoe, ma ni berita nako im b'a e na toro i roum n taai nako?

⁵Ko kona ni kabaea kaanga te mannikiba ae maninaki, b'a kaanga te b'ai ni kamimii nakon am toro te aine?

⁶A konaa taan akawa n ngureakina aron kabooakina. A konaa taan kaboo irikomaiu ni koroia mai nuukana i bukin kabooakina nako?

⁷Ko kona n ewara kunna n taiani kainiwai n akawa, ke ni katebea atuuna ni b'ain katebean te ika?

⁸Bon ti teuana am tai n un ma ngaia, ao ko aki manga oki riki.

⁹Ngkana ia ane e noora te rib'aietan, ao e na koenako ninikoriana, ao e na b'aka i aon te tano.

¹⁰E rangi ni kakamaaku ngkana e un, bon akea ae kona ni kaaitaraa.

¹¹A bane ni kabuanib'ai aika buakanna. Bon akea ae kona ni karaoa aei n te aonnaba.

¹²N na taekina nako im aron rangan te rib'aietan, ma ni kab'arab'ara marurungina ma korakorana.

¹³Bon akea temanna ae kona ni kuota nako kunna, ke n ewara nangoana ae kaanga biiti, are e karin i aona.

¹⁴Antai ae kona ni kaurea m'angaina, aika katobibiaki n taiani wii aika kakamaaku?

¹⁵E karaoa nuukana n taian otanga aika karinanaki raoi, aika a nim n tatabeua nako, ni matoatoa kaanga te atiibu.

¹⁶E nim ni matoatoa teuana nakon teuana, n te aro are e aki rin angin te ikeike i marenaia.

¹⁷A bane n nim ni matoatoa n te aro are akea ae kona ni kanakoa teuana man teuana.

¹⁸E iti te oota ngkana e m'atie, ao e ura matana kaanga otin taai.

¹⁹E ura te ai mai wiina, ao a tiinako taiani kiakia n otinako.

²⁰E otinako te bubu mai b'airina kaanga aron te bubu man te uteute ae ura i aan te b'aata.

²¹E kaura te ai ikeikena, a kibanako taian ura mai nanon wiina.

²²E rangi n korakora roroana n te aro are a bane ni maaku ake a kaitibo ma ngaia.

²³Ao bon akea te tabo teuana ae maraurau i aon kunna; e rangi ni matoatoa, ma n aki kakai uruaki n ai aron te biti.

²⁴E aki kona ni maaku nanona ae te atiibu, n ai aron te atiibu n ib'araua ae matoatoa ae aki ururuaki.

²⁵Ngkana e teirake, ao a na bon rootaki naba n te maaku aomata aika korakora; a na bon akea manenaia i bukin korakoran te maaku.

²⁶Bon akea te kabaang ae kona ni kaikoakia; akea naba te kainiwai, ke te kanoa ni katebe, ke te kainikamate ae kona n tiringnga.

²⁷B'a kaanga ai aron marauraun te uteute te biti i rouna, ke kaanga ai aron te mka ni kai i rouna.

²⁸Bon akea te kanoa ni katebe teuana ae na kona ni kabirinakoa; taiani m'akoro ni b'a ake e karetuaaki iai, kanga ai aron taiani uteute aika uarereke.

²⁹Kaanga ai aron te uteute ae m'auteretere i rouna te kainikamate, ao e ngare i rouia aomata ngkana a karetekeia n taiani kainiwai.

³⁰Ngkana e nakonako i nanon te bokaboka, ao e tane mwiin birotona, ae kaanga ai aron mwiin biiti aika kakang ake b'ain kamarauan te tano.

³¹E kakibea taari kanga ai aron te ran ae buro, ao e kauea n ai aron buroburon te b'a i nanon te b'aata.

³²E tiki airana imwiina, ao e onika taari nakon taian nao aika ngarengare.

³³Bon akea te b'ai teuana n te aonnaba ae kona ni kabotauaki ma ngaia; bon te aekaki ni man ngaia ae akea te maaku i rouna.

³⁴A tararake naba maan aika kamoamoa i aana; bon ngaia aia uea maan ake a katam'anti ni kabane.