Read Te B'aib'ara Iobi 9 Bible Online

Iobi 9 - Te B'aib'ara bible

Iobi 9

¹Ao e taku Iobi,

²Eng, I a kaman ongo b'aai ni kabane akanne mai m'aaina. Ma e na kanga n tokanikai te aomata ngkana e kaitaraa ma te Atua?

³E na kangaa ni kauntaeka te aomata temanna ma Ngaia? E kona n titiraki teuana te nga te titiraki, ao bon akea temanna ae kona ni kaekai.

⁴E rangi n rabakau te Atua ao E m'aaka, ao bon akea te aomata ae kona n teirake ni kaitaraa.

⁵E kam'aei maunga n te aro ae aki kantaningaaki, ao e kamaunai naba n unna.

⁶E karokoa te m'aeiei, ao e ioioa te aba. E karurui taiani boua ake a tabeka aonteaba.

⁷E kona ni katoka otin taai, ao ootan taian itoi n te tairiki.

⁸Bon akea temanna ae buoka te Atua ngke E taakina nako karawa, ke ngke E toubekaa nukan te mannikaakang ae kakamaaku are i taari. [14]

⁹Ao te Atua, E katinetinei itoi i karawa itoin meang, roon Nei Auti, Nei Auti, ao itoini maiaki.

¹⁰Ti aki kona n atai baika ab'ab'aki aika E a tia ni karaoi, ao akea tokin Ana m'akuri aika kamimii.

¹¹Ngkana E roko ao I aki nooria, ao ngkana E taonnako ao I aki namakinna.

¹²E anaa te b'ai ae bon taku, ao bon akea temanna ae kona ni katokia; akea temanna ae na kataia n titirakinna ni kaangai, tera ae Ko karaoia?

¹³E teimatoa unin te Atua, ao E kamanatuaia Ana kairiribai ake a buoka Raaba, are manin taari ae kakamaaku, are e aki toki ni kakaitaraa te Atua.[15]

¹⁴Ma ngaia are N na kanga ni kakaei au taeka ake N na kabooi iai Ana taeka te Atua?

¹⁵Ngkai bon akea au bure, ao te b'ai ae I ti konaa ni karaoia bon ti te bubuti Ana akoi te Atua ae au Tia Moti.

¹⁶Ma e ngae ngkana E anganai au tai n taetae n te tai aei, ma I bon aki kakoaua b'a E na kakauongo i rou.

¹⁷E kanakoa te angibuaka n oreai ma ni kakunikuna rab'atau n akea bukina ae riai.

¹⁸E aki anganai au tai b'a N na rawea moa ikeu teutana, E kaonrakea maiu n te mwebuaka.

¹⁹Tao N nang imanono? N nang imanonoa te Atua? I kona ni kateia n te kabowi? Iai ae kona ni kam'ananga nakon te kabowi?

²⁰I bon aki bure, ao I kakaonimaki, ma e aki reke maiu n au taeka, ao b'aai ni kabane aika I taekin, a taraa ni manga kabuakakaai.

²¹I bon aki bure, ao I aki tabe iai. I a kua n te maiu aei.

²²Ti te bo ngkana e tiringaki te aomata ae akea ana bure ma te aomata ae iai ana bure iroun te Atua.

²³E ngare te Atua ngkana e karina ni mate te aomata ae akea ana bure.

²⁴E anga te aonnaba te Atua nako ia aomata aika buakaka. E kamatakiia taani moti ni kabane. Ao ngkana tiaki te Atua ae karaoi, ao antai ae karaoi?

²⁵A waekoa ni birinako au bong, ao bon akea teuana mai buakoia ae raoiroi.

²⁶E a taonnako maiu kaanga te booti ae beibeti nako ni waekoa, ao kaanga ai aron naba bakareren te karakara ngkana e rawea te ika.

²⁷Ngkana I kataia ni kakukureiai b'a I aonga ni m'anuokin marakiu,

²⁸ao a manga okiokirai rawawatau ni kakamaakai. I ataia b'a E taumatoaai naba te Atua b'a te tia bure.

²⁹E aera ngkai I boni kauntaeka naba, ao are ai te tia bure ngai?

³⁰Bon akea te toobu ae na kona ni kaitiaki au bure.

³¹E tewenakoai te Atua nako nanon te rua ae kammaira, n te aro are a rangi ni kam'araa kunnikaiu iai.

³²Ngke bon te aomata te Atua, ao N na bon kona ni kaekai Ana taeka, N na nako ma Ngaia nakon te kabowi ni kaetieti ma Ngaia.

³³Ma bon akea temanna ae kona n tei i marenara akea ae kona n roko n anga ana moti i aora ni kauoman.

³⁴E a tau oreakiu te Atua! E a tau kakamaakakiu.

³⁵B'a I aki maaku. I a kona moa n taetae b'a I ataa ae bon oin nanou.