Read Te B'aib'ara Taian Areru 10 Bible Online

Taian Areru 10 - Te B'aib'ara bible

Taian Areru 10

¹Te UEA, Ko aera ngkai Ko kararoako? E aera ngkai Ko karabako ngkae I a reke n te kaangaanga?

²A b'ainikirinaki aomata aika akea aia b'ai irouia aomata aika a kainikatonga. Ane a na boni m'ane n aia babaaire aika a boni bubuaka.

³E kainikatonga te aomata ae buakaka n ana iango aika bubuaka; Ao te aomata ae kani b'aib'ai e karereantia te Atua.

⁴E aki kan reitaki teutana ma te Atua te aomata ae buakaka; E taku n ana iango b'a akea te Atua.

⁵E totokanikai n ana waaki nako; ma E aki kona n oota n aron te Atua ni momotikitaeka, e aki toki ni mamataurikiia ana kairiribai.

⁶E taku n ana iango, “E nene ni matoatoa au waaki! N na teimatoa n tiitiku n rau raoi n arou aio.”

⁷E on wina n te kewekewe ao ana kakarabakau bon te kakaunuun ao te kani karaoa ae buakaka.

⁸E karabaa n taabo ni karan; b'a e na oroia ma ni kamateia akana akea aia bure.

⁹Kanga ai aron te raian ae e baki ae e karabaa i buakon kaai, b'a e na karekeia konana akana kananoanga; E na kam'aneia n ana b'ai ni kam'ane, ao e na katikitikiia nako.

¹⁰E b'atokotoko ao e tataninga, b'a e na raweia konana.

¹¹E taku n ana iango, “E matakii te Atua! E aki kona n noorai.”

¹²Te UEA ae te Atua, kareke kaiia akana buakaka! Ao ururingiia akana kananoanga!

¹³E aera te aomata ae buakaka, ngkai e kakeaa te Atua? Ma n taku i nanona, b'a E aki konaa te Atua ni karekea kaina!

¹⁴Ko taratara; ao Ko noori kabuanib'ai ma kaangaanga nako ao Ko tauraoi ni buobuoki n taai nako. E mwioko iroum ane kananoanga; b'a Ko buobuoka ane akea tamana.

¹⁵Urubekea m'aakan ane buakaka; ao katauaea i bukin te buakaka ake e karaoi ni karokoa e toki mani karaoana.

¹⁶Te UEA bon te King n aki tootoki. A na bane ni kiitana abaia aomata ake a toro irouia atua tabem'aang.

¹⁷Te UEA, Ko na ongo aia buubuti akana mangori; ao Ko na kakorakorai nanoia.

¹⁸Ko na ongo tangiia ni kani buokaki akana kananoanga ma akana akea aia karo; ao Ko na nanoangaiia n am Babaaire nako, b'a e aonga n toki aia m'akuri taani bangaomata.