Read Te B'aib'ara Taian Areru 104 Bible Online

Taian Areru 104 - Te B'aib'ara bible

Taian Areru 104

¹N na karaoiroa te UEA ni maiu, te UEA ae Atuau, ai kakannato ra Ngkoe! am B'ai te karineaki ma te mimitong; kanga ai aron ae Ko kunnikaiko iai.

²Ko otab'aniniaki n te oota b'a kanga niniram. Ko taakina karawa b'a kanga te roki.

³Ko katea mwengam i aon raan ake i etani karawa. Ko kabonganai naang b'a am kaanibuaka, Ao Ko m'am'ananga ni bain te ang.

⁴Ko kabonganai aang b'a taan ua-rongorongo i bukim; Ao kiakianakon ootan te iti b'a am Tia m'akuri.

⁵Ko katea aonnaba i aoni bouana, ao e na tei n nene ni matoatoa iai n aki toki.

⁶Ko rabuna aon aonnaba ni marawa b'a kanga te kunnikai ae taangaki ni bangaki i etani maunga.

⁷Ngke Ko boai raan, ao a teteke nako; a raanga nako ni b'anaam ae kanga ai aron rebwen te baa:

⁸A ri aoni maunga ao a ri nanoni m'arua nakon te tabo are Ko katauraoia i bukiia.

⁹Ko katei tiaia, b'a a na aki manga ri aona; B'a a aonga n aki manga rabuna aon te aba.

¹⁰E karaanga nako raan aika koburake nako nanoni m'arua; A raanga nako i marenani maunga.

¹¹A bane ni moi iai maan aika aki manana; A katoki takaia iai aati aika aki manana.

¹²A maeka mannikiba ni kaai ake i rarikiia; Ao a tatangitang mai aoni m'aangaia.

¹³Ko kab'aka te karau nako aoni maunga mai karawa, Ao e kaonaki aon te aba n te kab'aia mai Roum.

¹⁴Ko kamaiu uteute b'a kanaia maan, ao te aroka b'a e na ribanaaki iroun te aomata, B'a e aonga ni karekea te am'arake mai aontano,

¹⁵Ma te wain i bukini kakukureian nanona, Ma te b'aa b'a e na kabira ubuna iai ni kamaraberabea, Ma te am'arake b'a e aonga ni marurung iai.

¹⁶E bati te ran ae a tebotebokaki iai arokan te UEA, ake kaai ake tiiran Reb'anon, ake E uniki.

¹⁷A katei ngaoia iai mannikiba; E reke nen te mannikiba ae kanga te kaai ni kaai aika ai aron te burukam.

¹⁸A reke mwengaia kooti aika aki manana ni maunga aika ririeta, Ao a kona maan aika uarereke ni karabaia i marenan atibu aika buburakaei.

¹⁹Ko karika nam'akaina b'a b'aini baireani boong; Ao e ataa ana tai ni bung taai.

²⁰Ko karika te roo, ao a bane n oti nako manin buakonikai n te bong.

²¹A bekorara raian ataei n aia tai ni kaae konaia: A ukoukori kanaia ake E katauraoi te Atua i bukiia.

²²A oki ni wene n aia tabo ngkana e a oti taai;

²³Ao a nako ngkanne aomata ni karaoi aia m'akuri; ao a m'akuri ni kabongnga.

²⁴Te UEA, ai batiraa am M'akuri! Ko a rabakau ra ni karaoi! A on aonnaba ni baika iai te maiu iai.

²⁵Arei marawa ae ab'ab'aki ao n raababa, ike a mena iai baika maiu aika moan te m'aiti kurikuri, Aika uarereke ao aika ab'ab'aki.

²⁶A boborau iai kaibuke; E mena iai Rib'aietan, [33] manin taari ae korakora are Ko karaoia; are E tebetebe i taari.

²⁷A bane ni kaantaningaiko b'a Ko na angania kanaia n te tai are a kainanoia.

²⁸Ko angania kanaia ni baim ao a am'arake ni karokoa ae a rauaki.

²⁹A maaku ngkana Ko tan nako; A mate ngkana Ko motiki ikeia, Ao a manga okira te tano are a nako mai iai.

³⁰Ko karikiia ni kabane iroun Tamneim, ao Ko angan te aba te maiu ae boou.

³¹Ke e aki toki mimitongin te UEA! ke E kim'areirei te UEA ni baika E a tia ni karaoi!

³²E tara aonnaba, ao e m'aeiei; E riingi maunga, ao e ti rake te bubu.

³³N na anene nakon te UEA ni karokoa tokini maiu; N na anenea karaoiroan Atuau ngkai iai irou te maiu.

³⁴E bia kukurei n au iango, ngkai kukureiu boni mai Rouna.

³⁵A bia kamaunaki taani bure mai aon te aba; A bia akea aomata aika buakaka. Karaoiroa te UEA, tamneiu! Karaoiroa te UEA!