Read Te B'aib'ara Taian Areru 105 Bible Online

Taian Areru 105 - Te B'aib'ara bible

Taian Areru 105

¹Katituaraoa te UEA, ao taromauria; Tuangiia botannaomata baika E a tia ni karaoi.

²Anene nakoina, anenea karaoiroana: Taekini baika kamimii ake E a tia ni karaoi.

³Kam na kakatonga i bukin arana ae tabu; Ke a kim'areirei nanoia ake a taromauria te UEA.

⁴Kam na nako n te UEA b'a E m'aaka; Tai toki n taromauria.

⁵Kam na uring ana m'akuri ake a kamimii ake E karaoi, Ana kakai ma ana moti ake a tia,

⁶Ngkami akana ana kariki Aberaam are ana toro, Akana kanoan Iakob'a, akana kam rineaki i rouna.

⁷Bon Atuara te UEA, ao e rooti taabo nako ana kaetitaeka.

⁸E aki toki n uringa ana boraraoi, E na bon aki kona ni m'aninga ana taeka nakoimi i nanon rooro ma rooro;

⁹Are ana boraraoi are E karaoia ma Aberaam, Ao ana taeka n akoi nakon Itaaka,

¹⁰Are E kamatoa nakon Iakob'a b'a te tua, b'a te boraraoi ae akea tokina:

¹¹Ngke e kaangai, “N na anganiko te aba are Kanaan, b'a tib'angami ae kam na abanna.”

¹²Ti tabeman ngaiia, ngke a mena i Kanaan, ao a iruwa i aona.

¹³A m'am'ananga man te botannaomata teuana nakon teuana, Ao man te aba teuana nakon teuana.

¹⁴E tuki b'ainikirinakiia irouia aomata; Ao E boaiia uea i bukiia,

¹⁵Ao E kaangai, Tai riingia au aomata aika rineaki, aika au burabeti, ao tai tabareia.

¹⁶E karokoa te rongo i aon te aba te UEA, ni karokoa bon akea te am'arake.

¹⁷Ma E a kamani kanakoa Ioteb'a, are e kaboaki nako b'a te toro.

¹⁸A kabaeaki waena ma roroana n taurekereke aika biiti.

¹⁹E tiku Ioteb'a b'a te toro ni karokoa e koro bukin ana taeka, ao e toki kataana iroun te UEA.

²⁰E a kainaomataki Ioteb'a iroun uean Aikubita; are ngaia are tautaeka i aoia aomata.

²¹E kateia b'a mataniwin ana tautaeka, ao te tia tau mwin ana b'ai nako.

²²E anganna te m'aaka n tau aroia ana aobitia, ao te kona n reireiniia baika a riai ni karaoi.

²³E roko Iakob'a i Aikubita, ao e maeka n iruwa iai.

²⁴A kabatiaki aia kariki ana Aomata iroun te UEA, Ao E kakorakoraia riki nakoia aiaia.

²⁵E kaun nanoia I-Aikubita b'a a na ribaia ana Aomata ake a toro i rouna, ao a na m'am'anaia.

²⁶E kanakoa ana tabonibai are Moote, ma Aaron are E a tia n rineia.

²⁷A kaoti ana kanikina te Atua i Aikubita, ao a karaoi kakai naba ikekei.

²⁸E karooa aon te aba, ma a aki ongeaba n ana taeka.

²⁹E oniki aia karaanga nakon te raraa, ao E kamateia ika ni kabane.

³⁰E buta aon abaia ni biraoki; a kaona naba ana tabo ni maeka te uea.

³¹E taetae, ao a roko naba naango ma kinnongo ni kabutaa aon abaia.

³²E kab'akai aitiburaoki aika totoa n irianaki ma te itiiti b'a oneani mwin te karau.

³³E erei aia kureebe ma aia biku, ao E tiribooi kain abaia.

³⁴E taetae, ao a roko karinan ni keeketi aika kanga ai aron te taake, aika aki konaaki ni warekaki m'aitiia.

³⁵A kabane aroka ake i abaia ni kang, ao a kang naba uaan abaia.

³⁶E kamateia ni kabane naati m'aane ake karimoa n aia utu nako I-Aikubita.

³⁷Ao E kairiia ni kaotinakoia Iteraera ma uotaia aika tirewa ma koora: Ao a bane ni marurung ma ni korakora rab'ataia.

³⁸A kukurei I-Aikubita irouia ngke a nako, B'a a makuia.

³⁹E takina te nang i etaia, ao te ai b'a kaotaia n te bong.

⁴⁰Ngke a bubuti, ao E kanuaia n te am'arake ae bati mai karawa, ake taiani mannikiba.

⁴¹E katabwena te b'aa, ao e ti nako te ran, Ao e raanga nako nanon te rereua b'a kanga te karaanga.

⁴²B'a E uringa ana taeka are tabu nakon Aberaam are ana toro.

⁴³Ma ngaia are ngke E kairiia nako ana Aomata, Ao a anene n takaakaa ni kim'areirei.

⁴⁴Ao E anganiia aaba ake abaia botannaomata tem'angina, Ao E anganiia naba aia b'ai nako ake uaani mwin aia m'akuri:

⁴⁵B'a a aonga n ongeaba nakon ana taeka, ma ni kawakin ana tua. Kam na kamoamoa te UEA!