Read Te B'aib'ara Taian Areru 106 Bible Online

Taian Areru 106 - Te B'aib'ara bible

Taian Areru 106

¹Kam na kamoamoa te UEA! Katituaraoa te UEA, b'a E raoiroi: akea tokin ana atataiaomata.

²Ai antai ae kona n tataekina taekan ana m'akuri te UEA aika ab'ab'aki? Ao ai antai ae kona ni kaota karaoiroana ni kabanea?

³A kab'aia akana b'ab'aina te koaua ma te eti ni maiuia n taai nako.

⁴Te UEA, uringai ngkana Ko buokiia am Botannaomata, Ao kamaiuai ma ngaiia;

⁵B'a I aonga n nora kab'aiaia ake a rineaki iroum, Ao ni kim'areirei ni kukureia am Botannaomata, Ma ni kamoamoaai ma am Aomata.

⁶Ti a tia ni bure n ai aroia naba ara bakatibu, Ti a tia ni karaoa ae bure ma ae buakaka.

⁷A tia ara bakatibu n aki atai nanon am M'akuri ake a kamimii i Aikubita. A aki uring m'aitin am Atataiaomata; ao a rawa nakon Teuare M'aaka i Tari are Uraura.

⁸Ma E kamaiuia i bukini karinean arana, B'a E aonga ni kaota m'akana.

⁹E taetae nakon Tari are Uraura, ao e a ora naba; Ao E kairiia ana aomata ri nanon Tari i aon te tabo ae m'au.

¹⁰E kamaiuia mairouia aia kairiribai, ao E kainaomataia mairouia aiaia.

¹¹A b'ab'a aiaia i taari, akea nikiraia n tiku.

¹²A kakoauai ana taeka; ao a anenea karaoiroana.

¹³A kai m'anuoki ana m'akuri; ao a aki tataninga ana taeka.

¹⁴Ma iai nanoia ae korakora ni kan am'arake i nanon te rereua, Ao a kataa te Atua iai.

¹⁵Ma ngaia are E anganiia te baere a butiia; Ao E anganiia naba te aoraki ae kamaamate.

¹⁶Ngke a bakantang irouni Moote n aia tabo ni kaemb'a n te rereua, Ao iroun naba Aaron are ana ibonga te UEA,

¹⁷Ao e tabwena aontano, ao e oonga Ratan, ao e tauna Abiram ma ana utu.

¹⁸E ura rake te ai i buakoia, ao e kabuokiia raoia ni kabaneia ake a buakaka.

¹⁹A karaoa katotongan te kao te teei i Oreb'a, Ao a bobaraaki n taromauria te bouananti are a karaoia.

²⁰A onika mimitongin te Atua nakoni katotongan te kao ae kaakang uteute.

²¹A m'anuoka te Atua are aia tia kamaiu, are E karaoi baika ab'ab'aki i Aikubita,

²²Ake m'akuri aika kamimii; ao E karaoi naba m'akuri aika kakamaaku i Taari are Uraura!

²³Ngke E taku b'a E na kamaunaia ana Aomata, Ao e tei ana toro are E rineia, are Moote, n taetae ma te Atua i bukiia b'a E na aki kamaunaia n unna.

²⁴A riba te aba are a na anganaki, b'a a aki kakoaua ana taeka ni bau te Atua;

²⁵A ngurengure i nanon aia um'arianna, Ao a rawa ni kan ongo ni b'anaan te UEA.

²⁶Ma ngaia are E kab'aka ana taeka ae matoatoa nakoia, B'a E na kamateia i nanon te rereua,

²⁷Ma ni kauamaaeia nako aia kariki i buakoia botannaomata, Ao a na mate n aaba aika tiaki abaia.

²⁸A ira taromauriani B'aara i Beore[34] ao a kang karea ake a katauaki i bukiia atua ake akea te maiu i nanoia.

²⁹Ao a kaunna n aia m'akuri anne, ao e b'akariia te aoraki are kamaamate.

³⁰Ma a buokaki irouni Bineati,[35] ao e toki te buti n aoraki.

³¹E ururingaki n ana m'akuri ae raoiroi aei ma ngkekei ao n aki toki.

³²A kauna te UEA i rarikini koburakenran i Merib'a; Ao e reke n te kaangaanga iai Moote i bukiia:

³³A kabonoa nanona n te aro are e a taetae iai n te aro ae aki riai.

³⁴A aki kamateia botannaomata n ai aron tuangaia iroun te UEA,

³⁵Ma a i raorao ma ngaiia, ao a b'ain aia katei.

³⁶Ao a m'ane irouia b'a a taromauri aia bouananti.

³⁷A anga natiia m'aane ma natiia aine b'a karea nakoia atua ni kewe.

³⁸A kamateia natiia aika akea aia bure, ao e kam'araeaki aon te aba i bukini m'akuri n tiritiri aikai.

³⁹A kam'araeaki n aia m'akuri, ao a aki kakaonimaki nakon te Atua.

⁴⁰Ma ngaia are E un te UEA irouia ana botannaomata; Ao E ribaia.

⁴¹Ao E anga ngaiia nako nanoni baiia botannaomata tabeua; Ao a tautaekanaki irouia aia kairiribai.

⁴²A b'ainikirinaki irouia aiaia, ao a aantaeka irouia.

⁴³E bati ana tai ni kamaiuia, ma ti te katei rakeaia nakoina; A aki toronaomata i bukin aia bure.

⁴⁴E ngae n anne, ao E bon ongo naba aia tataro n aia tai n rawaawata.

⁴⁵E uringa ana boraraoi i bukiia, ao E bita nanona n nanoanga n ai aroni m'aitin ana ataataiaomata;

⁴⁶Ao a riki n nanoangaki iai irouia ake a taenikai irouia.

⁴⁷Te UEA ae Atuara, kamaiura, ao kaokira mai buakoia botannaomata, B'a ti aonga n anga ara katituaraoi ma ara nebonebo nakon aram ae tabu.

⁴⁸E na karaoiroaki te UEA ae Atuaia Iteraera, kamoamoaa ngkai ao n aki toki! Ao ke a bane aomata ni kaangai, “Amen!” Kamoamoaa te UEA!