Read Te B'aib'ara Taian Areru 115 Bible Online

Taian Areru 115 - Te B'aib'ara bible

Taian Areru 115

¹Tiaki ara b'ai te neboaki! Boni Ngkoe te UEA, ae Ko na anganaki te neboaki i bukin am Kakaonimaki ma am Atataiaomata.

²A aera botannaomata b'a a na titirakiniira ni kaangai, E nga Atuami?

³E mena Atuara i karawa; ni karaoa ae E bon taku.

⁴A karaoaki atuaia man tirewa ma koora irouia aomata.

⁵Iai wiia, ma a aki kona n taetae; iai mataia, ma a aki noraba.

⁶Iai taningaia, ma a aki kona n ongo; iai b'airiia, ma a aki kona n aroboi.

⁷Iai baiia, ma akea aia namakin; iai waeia, ma a aki kona n nakonako; ao aki kona ni kakarongoa.

⁸Ni kabane aomata ake a karaoi bouannanti ma n onimakin bon akea uaaia kanga ai aroia bouannanti ake akea uaaia.

⁹Ngkami aika Iteraera, onimakina te UEA b'a e na buokingkami mani kawakiningkami.

¹⁰Ngkami aika ana utu te ibonga are Aron, kam na onimakina te UEA b'a e na buokingkami mani kawakiningkami.

¹¹Ngkami ni bane aika kam taromauria te UEA, kam na onimakinna b'a e na buokingkami mani kawakiningkami.

¹²E uringira te UEA, ao E na kakab'aiaira; E na kakab'aiaia te botannaomata ae Iteraera ma ana utu Aron.

¹³E na kakab'aiaia aomata n tatabemaniia nako aika karinea, aika kakannato ma aika mangori.

¹⁴I tataro b'a te UEA E na karika ami utu ma ami bakatibu te marurung n tainako

¹⁵Kam bia kakab'aiaki iroun te UEA, ae karaoa karawa ma aonnaba!

¹⁶Ana b'ai karawa te UEA n ti Ngaia, ma E anga aonnaba nakoia aomata.

¹⁷A aki kona ni kamoamoa te UEA (Iah) [41] akana mate.

¹⁸Ma ngaira, aika ti maiu, ti na katituaraoia ngkai ao n aki toki. Kam na neboa te UEA!