Read Te B'aib'ara Taian Areru 116 Bible Online

Taian Areru 116 - Te B'aib'ara bible

Taian Areru 116

¹I tangiriko te UEA, B'a ko ongo b'anaan au tataro.

²Ngkai ko ongo b'anaau, ao N na aki toki ni weteiko ngkai i teimatoa ni maiu.

³I otab'aniniaki ni kabuanib'ai aika N na mate iai; E taonai kakamakun te mate; e korakora maku ma nakon nanou.

⁴Ma ngaia are I wetea te UEA, “I butiko, te UEA, kamaiuai!”

⁵E akoi te UEA, ao E raoiroi; E nanoanga Atuara.

⁶E kakawakiniia akana akea aia kona ni buokiia i bon irouia te UEA; ngke I reke n te kaangaanga, ao E kamaiuai.

⁷E tararuai ma te nano n akoi, n te aro are n aki manga raraoma.

⁸Te UEA, ko a tia ni kamaiuai man te mate; Ko katoki rannimatau ao ko kawakinai b'a N na aki b'aka.

⁹Ma ngaia ae N na nakonako ni iteram n te aonnaba aio ike a mena iai akana maiu.

¹⁰I teimatoa n onimaki, e boni ngke I a kainano ni maraki,

¹¹Ao ni mangaongaon au iango ao i kaangai, “Akea ae I kona n onimakinna!”

¹²Tera ae N na angan te UEA b'a boon ana akoi ni kabane nako iu?

¹³N na uota te wain b'a au karea nakon te UEA, ni katituaraoia i bukini kamaiuakiu i rouna.

¹⁴N aia tai ni bootaki ae ab'ab'aki ana Aomata, ao N na kakoro bukini baike I a tia n atong ake au taeka ni bau b'a N na karaoi.

¹⁵Ai rawaawata ra nanon te UEA ngkana e mate temanna irouia ana aomata.

¹⁶I neboiko, te UEA; n ai aron are kakaraoia tinau. Ko a tia ni kamaiuai man te mate.

¹⁷N na anganiko te karea ae kaotan au katituaraoi nakoim, Ao N na tataro nakoim.

¹⁸N na kakoro bukini baike I a tia n atong n au taeka ni bau nakon te UEA ngkana a bootaki am aomata

¹⁹i nanon te Tembora are ana Auti te UEA i Ierutarem. Kam na neboa te UEA!