Read Te B'aib'ara Taian Areru 132 Bible Online

Taian Areru 132 - Te B'aib'ara bible

Taian Areru 132

¹(Te Anene n ararake) Te UEA, tai m'aninga taekan Tawita ma kaangaanga ake e kaitaraa ma ngaai.

²Te UEA, Ko na uringa ana taeka are kab'aka nakoim, are ana taeka ni bau, ngkoe ae te Atua ae M'aaka ae Atuan Iakob'a:

³N na aki okira mwengau ke nneu ni wene:

⁴N na aki motirawa ke ni matu,

⁵Ni karokoa ae I karekea te tabo ae E na maeka iai te UEA, ae te Atua ae M'aaka ae Atuan Iakob'a.

⁶Ngke ti mena i Eberata, ti ongo taekan te Atiniberita ae e mena n te tabo teuana n uakaan ma Iaara.

⁷Ao ti kaangai, “Ti na nako n ana auti te UEA; ti na taromauri i matan ana kaintokanuea.”

⁸Te UEA, Ko na nako ni Nnem ni Maeka, Ngkoe ma te Atiniberita are kanikinaeani m'aakam.

⁹A na b'ab'aina te eti am ibonga n taai nako; a na anene n takaakaa ni kakatonga am botannaomata!

¹⁰Ko a tia ni kab'aka am Taeka nakon Tawita are am toro, ma ngaia ae tai rawa nakon te uea are Ko rineia.

¹¹Ko a tia ni kab'aka am Taeka ni bau nakon Tawita am berita ae Ko na boni kakoroa bukina: “N na karika temanna irouia natim m'aane b'a te uea, Ao e na onea mwim n tautaeka.

¹²Ngkana a kawakina au boraraoi natim ao a kawakin naba au taeka aika I anganiia, Ao a na riki naba natiia b'a uea n ai arom n aki toki.

¹³E a tia te UEA n rinea Tion; E tangiria b'a e na riki b'a mwengana:

¹⁴Aio te tabo ae N na maeka iai n aki toki; aio nneu ae I tangiria b'a au tabo n tautaeka.

¹⁵N na kakab'aia Tion ni karekei nakoina b'aai ni kabane aika e kainanoi; N na kanuaia n te am'arake ana aomata akana kananoanga.

¹⁶N na kakab'aiaia ana ibonga ni b'aai ni kabane akana a karaoi, Ao a na takaakaa n anene ma te kakatonga ana botannaomata.

¹⁷Aio te tabo ae N na karika iai temanna mai buakoia ana kariki Tawita b'a te uea ae kakannato; Aio te tabo naba ae N na kateimatoa mai iai ana tautaeka te uea ae I rineia.

¹⁸E na kab'ainrangiia ana kairiribai, ma e na kakab'aia ma n tekeraoi ueana.