Read Te B'aib'ara Taian Areru 139 Bible Online

Taian Areru 139 - Te B'aib'ara bible

Taian Areru 139

¹(Te areru mairoun Tawita i bukin te tia kaira te katangitang.) Te UEA, Ko a tia ni kekera nako arou ao Ko ataai.

²Ko atai b'aai ni kabane aika I karaoi; Ko ataa nanou mai kiraroa.

³Ko norai ngkana I m'akuri ke ngkana I wene ni motirawa; Ko atai aroarou ni kabane.

⁴I m'ain taetaeu ao Ko a kaman ataa te taeka ae na oti nako mai wiiu.

⁵Ko mena i rarikiu n iterau nako; Ko kamanoai ni m'aakam.

⁶E kamimii irou te ataib'ai aei; e ri aon au atatai.

⁷N na nakea mairoun Tamneim? N na biri nakea mai matam?

⁸Ngkana tao I rierake nako karawa, ao bon are iai naba Ngkoe; Ngkana tao I karaoa nneu ni wene i nano n aia tabo maate, ao bon are iai naba Ngkoe.

⁹Ngkana tao I kiba nako nakon are i tinanikun are mainiku, ke ni maeka n te tabo ae te kabanea n raroa i maeao,

¹⁰ao Ko na boni mena naba ikekei ni kairiirai ma ni buobuokai.

¹¹I kona n tuanga te roo b'a e na karabaai ke te oota ae otab'aniniai b'a e na riki ni bong,

¹²Ma akea te roo iroum, ao e oota te bong n ai aron ootan te ngaina. Ti te bo te ngaina ma te bong iroum.

¹³Ko kariki b'ain nanou; Ko kariki b'ain rab'atau i nanoni biroton tinau.

¹⁴I katituaraoiko, b'a e kakamaaku ma ni kamimii karaoau iroum; A kamimii baika Ko karaoi, ao I ataia raoi.

¹⁵Ngke a moa n riki riu, ngke a karauaki n tomatomaaki raoi i nanoni biroton tinau, ngke I tabe n rikirake ikekei n te tabo ae raba, Ao Ko bon ataia ae I mena ikekei;

¹⁶Ko norai i m'aini bungiakiu. A kaman tauaki mwini boong ake a katauaki i buku i nanon am boki, i m'ain rokoia.

¹⁷Te Atua, ai kaangaanga ra kunean am iango irou; ai ewa ra m'aitiia!

¹⁸Ngkana I wareki m'aitiia, ao a bati riki nakoni m'aitin tanon aon te bike. Ngke I uti, ao Ko boni mena naba i rarikiu.

¹⁹Te Atua, ai terana ngke Ko tiringiia akana buakaka! Ai terana ngke a katukai n aki kumeai akana iowawa!

²⁰A atong taeka ni kabuakakako; a taetae n aki akaaka i bukin aram.

²¹Te UEA, ai ribaki ra irou akana ribaiko! Ai aki kan taraki ra irou mataia akana rawa ni kan aantaeka iroum!

²²Moan te korakora ribakiia irou; A riki b'a au kairiribai.

²³Te Atua, ko na kekera nako arou, ao ataa nanou, Ko na kataai, ao kunei au iango.

²⁴Ko na norai b'a iai te bae buakaka i nanou ke akea, Ao kairiirai i nanon te kawai ae akea tokina.