Read Te B'aib'ara Taian Areru 18 Bible Online

Taian Areru 18 - Te B'aib'ara bible

Taian Areru 18

¹(Ana Areru Tawita; ana b'ai Mataniwiia taan anene. E aneneia Tawita nakon te UEA i mwini kamaiuana i rouna mairouia aiana, ao ai moa ra riki mairoun Tauro) I tangiriko, te UEA, ae korakorau.

²Bon au b'a ni katantan ae rietaata ngkoe te UEA; Bon au nono ae matoatoa, ao te tia kamaiuai ngkoe; Bon Atuau ae nneu ni katanai ae I raba raoi i rouna; mairouia taan ribaai;

³I wetea te UEA, ae ana b'ai te neboaki, b'a E kamaiuai mairouia taan ribaai.

⁴A otab'aniniai kakamakun te mate, ao a taonai nako naona.

⁵A otab'aniniai kakamakun te mate, ao e katauraoa ana b'ai ni kam'am'ane te mate i m'aiu.

⁶Ngke e kai nanou, ao I wetea te UEA, ae Atuau b'a E na buokai. E ongo b'anaau man ana tembora, ao E ongora n tangu.

⁷Ao e m'aeiei ma n ruru aonnaba; Ao a ingiing ni m'aeiei naba aani maunga, i bukin unin te Atua.

⁸E ti nako bubun te ai mai b'airina, Ao te ai ae ura ma te m'akaro n ai mai wina.

⁹Ko kauka karawa kanga ai aron te roki, Ao E ruo rikaaki; Ao te nang ae roro i aani waena.

¹⁰E toka i aoia kerubim[5] ao E kiba; Ao E ukia te ang ni kakibam'akaa.

¹¹E rabunna n te roo; E otab'aniniaki n nangi ni karau aika matenten.

¹²A nako man te raneanea are i m'aina taian aiti-buraoki aika b'aka ni karau, ma kiakian ootan uran te ai.

¹³Ngke E taetae te UEA, ao ai aron rebwen te baa b'anaana; E ongo te aba b'anaan te Atua are Moan te M'aaka.

¹⁴Ao E katebe kanoan ana kainikatebe aika itiitini karawa, Ao E kauamaaeia ni kabirinakoia aiana.

¹⁵Te UEA, ngke Ko boaiia aiam, ngke e korakora angini b'airim n unim i rouia, Ao e oti aontanon nanoni marawa, Ao a oti naba aan aonnaba.

¹⁶E kanakoa baina te UEA mai karawa n tauai; E katikai rake man raan.

¹⁷E kamaiuai mairouia aiau aika korakora, Ao mairouia akana riribaai b'a a rangi ni korakora riki nako iu.

¹⁸Ngke I reke n te kaangaanga, ao a buakanai; ma E kamaiuai te UEA.

¹⁹E kainaomataai man te kaangaanga; E kamaiuai b'a kioina ngkae E kukurei irou.

²⁰E anganai kaniwangau te UEA i bukin ae I karaoa ae e raoiroi. E kakab'aiaai ngkai akea au bure.

²¹I a tia n ongeaba nakon ana tua te UEA; Ao I tuai ni bure, n tan nako mairoun Atuau.

²²I taratarai ana tua ni kabane n iri nanoia; I tuai aki ongeaba nakon ana taeka.

²³E ataia b'a akea au kairua, Ao I a tia ni kawakinai mani karaoan te bure.

²⁴Ma ngaia ae E anganai kaniwangau b'a kioina ngkai I karaoa ae e raoiroi, ao i bukina b'a akea au bure.

²⁵Ko kakoroi bukin am Taeka nakoia akana kakaonimaki nakoim; ao nakoia akana moan te raoiroi b'a moan te raoiroi naba Ngkoe.

²⁶Ko kaotiko nakoia akana itiaki b'a Ko itiaki; Ao nakoia taan tiakana te aba, b'a te tia tiakana naba te aba Ngkoe.

²⁷Ko kamaiuia akana mangori, ao Ko kamangoria akana kainikatonga.

²⁸Te UEA ae Atuau, anganai te oota; Kaota te roo ae I mena iai.

²⁹Ko anganai te korakora ni buakaniia aiau, ao te kona n tam'arakea nonon aia kaawa.

³⁰Te Atua aio, moan te raoiroi arona; A onimakinaki ana taeka! Ai aron te otanga nakoia ake a kataniia i rouna.

³¹Bon ti te UEA Atuara, ao akea riki; Ao ti Ngaia kamanoara.

³²Ngaia te Atua ae kakorakoraai, Ao E kaeta kawaiu.

³³E kabirim'akai waeu; n ai aron te ria E buokai b'a N na aki kabuanib'ai i aoni maunga.

³⁴E reireiai te aro ni buaka, B'a I aonga ni kabongana te kaini-katebe ae matoatoa.

³⁵Boni Ngkoe otangau ao au Tia kamaiu; I a riki ni kakannato i bukin am Buobuoki nako iu; Ao I kawakinaki man te kabuanib'ai ni m'aakam.

³⁶Ko kawakinai b'a N na aki reke irouia aiau; Ao I tuai n taenikai.

³⁷I kaeia taan ribaai ni karokoa ae a reke irou, Ao I kamateia.

³⁸I tiriboia, ao a aki kona n teirake; A konaaki b'a a mate.

³⁹Ko anganai korakorau ni buaka, ma au tokanikai i aoia aiau.

⁴⁰Ko kabirinakoia aiau mairou; I kamateia taan ribaai.

⁴¹A tangira buokaia, ma akea ae buokiia; A wetea te UEA, ma E aki ongo irouia.

⁴²I kamanatuaia ni karikiia n aroni bubun te tano are e na ukia nako te ang;

⁴³Ko kamaiuai mairouia aomata akana rawa n ongeaba nakoia taan tautaeka, Ao Ko katautaekaai i aoia botannaomata; ao a riki b'a au toro

⁴⁴A baraaki ni karineai aomata aika ianena; ngkana a ongo taekau, ao a ongeaba.

⁴⁵A kerikaaki korakoraia, ao a roko man ruru man aia nono.

⁴⁶E maiu te UEA; E na kamoamoaki te tia kamanoai! E na neboaki te Atua ae au tia kamaiu.

⁴⁷E katokanikaiai i aoia aiau; E kakiia botannaomata i aani m'akau,

⁴⁸Ao E kamaiuai mairouia taan ribaai. Eng, Ko katokanikaiai i aoia aiau, Ao Ko kawakinai mairouia taan tiritiri.

⁴⁹Ma ngaia ae N na karaoiroiko, te UEA i buakoia botannaomata, Ao N na anene ni kamoamoako.

⁵⁰E angan ana king taian tokanikai; E teimatoa n aki toki ana tangira nakon are E a tia n rineia, Are Tawita, ma ana kariki.