Read Te B'aib'ara Taian Areru 19 Bible Online

Taian Areru 19 - Te B'aib'ara bible

Taian Areru 19

¹(Te areru mairoun Tawita i bukin te tia kaira te katangitang.) A tataekina mimitongin te Atua taiani karawa, Ao a kaotioti baika E a tia ni karaoi taian nang.

²A tataekina te koaua aio n te ngaina ae koraki, Ao a kaotiotia ni katoa tairiki, b'a a tauaki taekaia iroun te Atua.

³E boni ngae n akea aia taeka ke b'anaaia ae e ongo te aba iai,

⁴Ma e roti taabo nako i aonnaba te baere a kaotiotia n akea temanna ae na aki ataia. E a tia te Atua ni karaoa nen taai i karawa;

⁵E oti nako mani nena n te ingabong, b'a kanga ai aron te m'aane ae kukurei b'a e a tib'a iein, Ke te tia biri ae e ingainga nanona ni kani biri n tain te kabobirim'aka.

⁶E oti n te ingabong n iterani karawa are te iterana nakon are te iterana, ao bon akea te b'ai teuana ae aki rotaki ni kabuebuena.

⁷Moan te raoiroi ana Tua te UEA; E karika te maiu ae boou. E teimatoa n aki totoki ana taeka n reirei te UEA; E kawanawana ane e roo nanona.

⁸A koaua ana taeka n reirei te UEA, Ao a kab'aia ake a iri nanoia. E aki bangaomata ana taeka n reirei te UEA, Ao e karekea te atatai nakoia aomata.

⁹Te b'ai ae e raoiroi karinean te UEA: E na kakaraoaki n aki toki. A eti ana Moti te Atua; a aki nanonano.

¹⁰E korakora riki kani karekeaia nakoni kani karekean te koora ni koaua; E raka riki reken te kukurei mai iai nakon te kukurei ae reke mani kanakin aia karewe manibeeru ae moan te kangkang.

¹¹A karekea te atatai nako iu, ngai ae am Toro; ao e reke kab'aiau n iran nanoia.

¹²Antai ae kona n nora oin ana kairua? Kamaiuai mani karaoani baika I aki atai b'a a buakaka!

¹³Kawakinai naba mani karaoani baika I atai b'a a bure; Tai kariaia b'a a na tautaeka i aou. Ao N na riki ni moan te raoiroi Ao N na kamaiuaki mani buakakan te bure.

¹⁴A bia riki au taeka ma namakin aika nako mai nanou b'a kakukureiam, te UEA ae te tia kamanoai ao au tia kamaiu!