Read Te B'aib'ara Taian Areru 30 Bible Online

Taian Areru 30 - Te B'aib'ara bible

Taian Areru 30

¹(Ana Areru Tawita n taini katabuan te Tembora) I neboiko te UEA, b'a Ko kamaiuai; ao Ko tukiia aiau b'a a na aki b'ainingareai.

²Te UEA ae Atuau, I tangira buokau mairoum, ao Ko katoka aorakiu.

³Ko kawakinai man te ruanimate; Ko kamaiuai ngke I a kani mate.

⁴Kam na anene nakon te UEA, ngkami aika ana Aomata aika kakaonimaki; Uring baika E a tia ni karaoi, ao katituaraoia.

⁵E rangi ni kimototo tain unna, ma e tei maan ana akoi i aoni maiun te aomata. A waanako rannimata ni kangainaa, ma e oneaki mwina n te kakatonga n te ingabong.

⁶I namakina te rau raoi, Ao I kaangai i nanou, Akea ae kona ni konaa aou.

⁷Te UEA, Ko raoiroi nako iu; Ko kakorakoraai b'a kanga ai aroni korakoran te maunga ae nene ni matoatoa. Ma ngke Ko karaba matam mairou, ao I maaku.

⁸Te UEA, I weweteiko; I bubutiko buokau.

⁹Tera manenani mateu iroum? ao tera ae n na karekea ngkana I a roko n te ruanimate? A kona maate ni kamoamoako? Ke n tataekina arom ni kakaonimaki?

¹⁰Te UEA, ongo irou, ao nanoangaai! Te UEA, buokai!

¹¹Ko a tia n onea nanokawakiu nakon te kukurei ae bati; ko uota nako rawaawatau, ao Ko kaonai n te kim'areirei.

¹²Ma ngaia ae N aki kainab'aabu, Ma N na anenea karaoiroam, Ngkoe ae te UEA ae Atuau. N na anganiko kamoamoaam n aki toki.