Read Te B'aib'ara Taian Areru 40 Bible Online

Taian Areru 40 - Te B'aib'ara bible

Taian Areru 40

¹(Te areru mairoun Tawita i bukin te tia kaira te katangitang.) I kakantaninga ana buobuoki te UEA: E kakauongo nako iu, ao E ongo au weewete;

²E katikai rake man te kinono ae kamaamate, mai nanon te bokaboka ae nimnim. E kateai raoi i aon te b'a, Ao E kanakonakoai raoi.

³E reireiai b'a N na anenea te kuna ae boou, i bukini karaoiroan Atuara. A na nora aio aomata aika bati, ao a na karinea ma n onimakina te UEA.

⁴A kab'aia akana onimakina te UEA, ake aki rairaki nakon bouannanti ke n raoniia akana taromaurii anti aika kewe.

⁵Te UEA ae Atuara, a bati am M'akuri aika kamimii aika Ko karaoi i bukira: bon akea n ai arom! A bati am Iango aika kamimii i bukira; I aki konai n taekin ni kabane: A m'aiti riki nakon aika konaaki ni warekaki!

⁶Ko aki tangiri karea ma angakarea; Ko aki tua maan aika ana kabuokaki ni kab'aninaki i aon te baonikarea ke karea i bukin kab'araan buure; Ma Ko anganai te kona n ongo am Taeka, ao n ongeaba nako iai,

⁷Ao I taku, Aio ngai! am kaetieti ibuku a bane ni koreaki ni bokin te tua.[14]

⁸Ai kukurei ra ngai ni karaoa ae Ko tangiria, Atuau! I kawakina am Tua i nanou.

⁹Te UEA, n aia tai ni bootaki am Aomata, Ao I taekina te rongorongo ae raoiroi, ae taekani kamaiuara iroum. Ko ataai b'a N na aki toki n taekinna.

¹⁰I aki karaba taekan am Kamaiu ni kainna i nanou; I tataekina am Kakaonimaki ma kamaiuan te aba iroum. I aki karaba taekan am Kakaonimaki ma am Atataiaomata nakoia am Aomata n aia tai ni bootaki.

¹¹Te UEA, I ataia e na bon aki kona n toki am nanoanga nako iu; N na kawakinaki raoi iroum, B'a Ko tangirai ao Ko kakaonimaki nako iu.

¹²A bati kaangaanga aika otab'aniniai, a riao m'aitiia! A taonai nako au bure aika bati, ao akea te bae I kona n noria; a m'aiti riki nakon iran atuu, ao e a b'ara nanou.

¹³Te UEA, taiaoka ma bareiko ni kamaiuai!

¹⁴A na bane ni mamaa ma n aki reke aroia akana kataia ni kani kamateai. A na rairaki n oki rikaaki ma te b'ainrang akana tangira kaikoakau!

¹⁵A na kuba ma ni mimi ni konaakiia akana b'ainingareai n aia taeka.

¹⁶A na bane ni kakatonga ma ni kukurei akana nakoim. A na aki toki akana kainanoa am Kamaiu ni kaangai, E na neboaki te UEA!

¹⁷Ao ngai, I a kaawa, ao e kai nanou; Ma E ururingai te UEA: Bon te tia buobuokai ao au tia kamaiu Ngkoe, Atuau! Bareiko ni buokai.