Read Te B'aib'ara Taian Areru 42 Bible Online

Taian Areru 42 - Te B'aib'ara bible

Taian Areru 42

¹(Te Areru i bukiia ana aomata Kora ao i bukin aia Mataniwi taan anene) Aron tangiran ranni karaanga iroun te man ae te ria, Ao ai aron naba tangiram irou, te Atua.

²E korakora tangiram irou, te Atua ae ko maiu. N ningai ae N na roko iai i matam n taromauriko?

³Bon ti kanau rannimatau ni ngaina ao ni bong; Ao a aki toki ni kaangai nako iu au kairiribai, “E nga Atuam?”

⁴E uruaki nanou ngke I uring boong ake a tia n nako: Ngke I m'ananga ma aomata aika bati, ni kairiia nakon um'an te Atua; Ao a anene ma te b'ana ni kakatonga ma n nebonebo nakon te Atua.

⁵E aera ngkae e rawaawata nanou? E aera ngkai I aki rau? N na kaantaninga te Atua, Ao N na manga neboia: B'a bon au tia kamaiu ao Atuau.

⁶E uruaki nanou; Ma ngaia ae I uringko man te maunga ae Oman, Ae te tabo ae e moa mai iai te aba ae Ioretan, Ao man te maunga ae Mitia, [15]

⁷A waaki ni b'aro riaou am nao, Kanga ai aroni marawa ae un, Ke te raanga n ran ae rurunga b'arona.

⁸E na kaota ana Tangira ae Teimatoa te UEA ni ngaina, B'a e aonga n reke kunau n te tairiki, Ae au tataro nakon te Atua ae anganai te maiu.

⁹I kaangai nakon te Atua ae te tia kamanoai, Ko aera ngkai Ko m'anuokai? I aera ngkai N na teimatoa n rawaawata ni b'ainikirinau iroun te tia ribaai?

¹⁰I rangi ni maraki n aia taeka ni kaenaena; B'a a aki toki ni kaangai nako iu, “E nga Atuam?”

¹¹E aera ngkae e rawaawata nanou? I aera ngkai I aki rau? N na kaantaninga te Atua, ao N na manga neboia: B'a bon au tia kamaiu ao Atuau.