Read Te B'aib'ara Taian Areru 5 Bible Online

Taian Areru 5 - Te B'aib'ara bible

Taian Areru 5

¹(Ana Areru Tawita i bukin te tia kaira te anene ae kabongana te b'ai ni katangitang ae kanga ai aron te bu) Te UEA, Ko na ongora n au taeka, Ao ongo naba kainanou.

²Atuau ao au king! ongo b'anaau ni kani buokaki! B'a I tataro nakoim.

³Te UEA, Ko na ongo n au tataro, n te ingabong; I kawenei au bubuti i matam, Ao I kakantaningaa am kaeka.

⁴Tiaki te Atua ngkoe ae Ko tangira te buakaka; e na aki maeka iroum ane buakaka.

⁵Ko aki kan tei i matan te tia kainikatonga; Ko ribaia ni kabaneia akana karaoa ae buakaka.

⁶Ko kamaunaiia taani kewekewe Ko ribaa te tiritiri, ao te tia kam'anea te aba.

⁷Ma i bukin batin am Tangira, ao I a kona n roko n am Auti; ao n taromauri n am Tembora are Tabu ma ni boobaraaki ni karineko.

⁸Te UEA, Ko na kairiirai n am Raoiroi i bukiia taan ribaai; Ko na kaboraoa kawaim ae N na iria.

⁹A aki onimakinaki baike a taekin au kairiribai; a tangira ti te urub'ai. A wiikoa ni wiiraraoi, ma a onrake nanoia n te kam'aam'ane.

¹⁰Te Atua, katuaaia; ao karika b'akaia boni man aia babaire. Kakionakoia mai matam i bukin aia bure aika a bati ma aia kakaitara nakoim.

¹¹Akana a biri nakoim i bukin katanaia; ke a anene ni kim'areirei n taai nako. Kataniia akana a tangiriko raoi ni koaua; ao kakim'areireia.

¹²Ara UEA, Ko na kakab'aiaia akana a ongotaeka iroum, a kamanoaki n am Tangira kaanga te otanga.