Read Te B'aib'ara Taian Areru 50 Bible Online

Taian Areru 50 - Te B'aib'ara bible

Taian Areru 50

¹(Ana Areru Ataba) E taetae Teuare M'aaka, ae te Atua ae te UEA; E weteia aomata nako i aonnaba mai tabona nako tabona.

²E oota nako mimitongina mai Tion, are moanibaan te tamaroa.

³E nangi roko Atuara, ao E na aki kainab'aabu; E ri moana te ai ae ura m'aaka, Ao E otab'aniniaki rarikina n te ang ae matoatoa karena.

⁴E wetea karawa ma aonnaba b'a taani kakoaua norana ni motiki taekaia ana Aomata.

⁵E kangai, “Kam na botiia au aomata aika kakaonimaki nako iu, ake a karaoa aia boraraoi ma Ngai n aia angakarea.”

⁶A kaotiota raoiroin te Atua taiani karawa: B'a bon te tia motiki-taeka Ngaia.

⁷Au botannaomata, kam na ongora, b'a N na taetae ni kaoti ami bure, ngkami aika Iteraera: Bon te Atua Ngai ae Atuami.

⁸I aki boaingkami i bukin ami karea ma ami karea ni kabuokaki ake a aki toki ni mena i matau.

⁹I aki kainanoa ami kao-m'aane ke ami koti-m'aane mani neia ami man;

¹⁰B'a bon au man manin nako te buakonikai, ma maan aika manana aika mena i aoni maunga aika tengaa.

¹¹I ataiia mannikiba ni kabaneia aika i aoni maunga; Ao au b'ai maan ni kabane aika manin aon te aba.

¹²Ngkana tao I baki, ao N na aki tuangko; B'a bon au b'ai aonnaba ma kanoana ni kabane.

¹³I kang irikoia kaom'aane? Ke I nim raraaia kooti?

¹⁴E na riki ami katituaraoi b'a ami karea nakon te Atua, Ao kam na kakoro bukin ami taeka ni bau nakon Teuare Moan te Rietaata.

¹⁵Kam na weteai n tain te kaangaanga; N na kamaiungkami, ao kam na neboai.

¹⁶Ma E kaangai te Atua nakon ane buakaka, Tera am b'ai ngkai ko taekin au tua? Tera am b'ai ngkai ko maroroakina taekan au boraraoi?

¹⁷Ko rawa ni kaetan arom, Ao ko ribaai au tua.

¹⁸Ko riki b'a raoia taan iraa akana ko kaitibo ma ngaiia; Ao ko reitiko ma taani wenenibure.

¹⁹“Ti te kan taekina te b'ai ae buakaka wiim, Ao e tatauraoi newem n atonga te kewe.

²⁰Ko tauraoi n tataetae ni bukiniia am utu b'a a bure, Ao ni kabuakakaia.

²¹Ko a tia ni karaoi baikai, ao akea au taeka iai; Ko taku n am iango b'a ti te bo arou ma arom. Ma N na boaiko, ao N na kaotia raoi i matam bukinam irou.

²²Ngkami akana kam m'am'anuoka taekau, Kam na ongora n aio b'a I kaawa n raebitingkami, ao akea ae na kamaiungkami:

²³Ane kareana te katituaraoi ao e karineai, Ao N na kamaiua ane ongeaba nako iu.