Read Te B'aib'ara Taian Areru 51 Bible Online

Taian Areru 51 - Te B'aib'ara bible

Taian Areru 51

¹(Ana b'ai Mataniwiia taan anene. Ana Areru Tawita, ngke e kawaria Natan are te burabeti, ngke e a tia ni kawara Nei B'atateb'a.) Te Atua, nanoangaai, b'a akea tokin am Atataiaomata! Kaitiakai man au bure, b'a e bati am Nanoanga!

²Tebokai raoi b'a I aonga n itiaki man au bure, ao kaitiakai man arou aika buakaka!

³B'a I atai arou aika buakaka, Ao e aki kona ni bua iangoan au bure.

⁴I a tia ni bure nakoim n ti Ngkoe, Ao I a tia ni karaoa ae buakaka i matam. Ma ngaia ae Ko eti ni motikan taekau, Ao akea burem ni kabuakakaau n am Moti.

⁵I aki inaomata man te bure ma ngke I bungiaki; I a kaman rotaki n te bure ngke I bikoukouaki.

⁶Ko tangira te nano ae b'ab'aina te eti ma te koaua; Kaonai ni wanawanam.

⁷Kaitiaki au bure mairou, ao I a itiaki iai. Tebokai, ao N na mainaina riki i aon te tinoo.

⁸Kaongoraeai ni b'anaan te kim'areirei ma te kukurei; e ngae ngke Ko karawawataai, Ma N na boni manga kim'areirei.

⁹Karabai matam man au bure nako, Ao kamaunai arou nako aika bubuaka.

¹⁰Te Atua, karika nanou ae itiaki, ao kabooua Tamneim ae kakaonimaki i nanou.

¹¹Tai kanakoai mai matam, Ao tai kaira nako Tamneim ae Raoiroi mairou.

¹²Manga kaoka nako iu te kim'areirei are reke man am Kamaiu, Ao karaoa ae N na kan ongeaba iai nakoim!

¹³N na reireiniia taani bure am Tua, Ao a na rairaki nakoim.

¹⁴Te Atua, ae te Tia Kamaiuai, kawakinai man te bure ae kakaiaki, Ao N na kim'areirei n tataekina raoiroim.

¹⁵Buokai b'a N na taetae, Ao N na neboiko.

¹⁶Ko aki tangira te karea; ngkana tao Ko tangiria ao I a anganiko; Ko aki kukurei n te karea ae kabuokaki.

¹⁷Au karea bon te tamnei ae nanorinano, Te Atua; Ko aki riba te nano ae uruaki ae raraoma.

¹⁸Te Atua, kaota am Atataiaomata nakon te kaawa ae Tion, ao buokiia; Manga katei nonon Ierutarem.

¹⁹Ao Ko a tib'a kukurei iai ni karea aika riai, Ao ane a na kareani kaom'aane i aon am baonikarea.