Read Te B'aib'ara Taian Areru 52 Bible Online

Taian Areru 52 - Te B'aib'ara bible

Taian Areru 52

¹(Ana Areru Tawita i bukin aia Mataniwi taan anene. E karioa aio ngke e nako Toeka mai Etom nakon Tauro ao e kaangai, E a tia Tawita n nako n ana auti Aimereka.) Ngkami aika aomata kam kona ni korakora, mani kainikatonga i bukin ami bure, ma E teimatoa onimakinan te Atua ni katoa bong

²Ko karioi iango aika a na uru aroia tem'angina; Ai aron te m'ariro ae kakang newem; Ko aki toki ni karioi taeka ni kewe.

³Ko tangira riki te buakaka nakon te raoiroi, Ao te kewe nakon te koaua.

⁴Ko tangira ae a na maraki nanoia aomata n am taeka, ngkoe ae te kewetaia!

⁵Ma ngaia ae E na urua arom ni kainikatonga te Atua; E na tauko ma te matoa ni katikiko nako mani mwengam; E na anaa maium.

⁶Ane a na nora te baei akana raoiroi ao a na maaku; Ane a na ngareakiniko ao a na kaangai,

⁷“Nora te aomata ae rawa n onimakina te Atua i bukini kamanoana, Ma e onimakin kaub'aina aika bati, Ao e iangoia b'a e na reke kab'aiana n arona ni bangaomata.”

⁸Ao ngai ai aron te kai ae te oriwa ae maiu raoi n um'an te Atua: I onimakina ana ataataiaomata te Atua n aki tootoki.

⁹N na katituaraoiko n aki toki i bukin are Ko a tia ni karaoia; N na kamoamoa aram ae e raoiroi ngkana a bootaki am Aomata.