Read Te B'aib'ara Taian Areru 58 Bible Online

Taian Areru 58 - Te B'aib'ara bible

Taian Areru 58

¹(Ana Areru Tawita; ana b'ai aia Mataniwi taan anene; ni b'anaan Tai Urua.) Kam b'ab'aina te eti n ami babaire, ngkami taan tautaeka[17] Kam motiki taekaia aomata n ae riai, ke kam aki?

²Kam aki! kam ti iaiangoi baika bubuaka aika kam kona ni karaoi, aika m'akuri ni kakeru i aon te aba.

³A kamani bure maiuia akana buakaka; a kaman rabakau ni kewe mai nanoni biroton tinaia.

⁴E boitin te aba irouia, Ao a bonoti taningaia kanga ai aron te naeta ae a bono taningana,

⁵Ae aki kona n ongo b'anaan te tia karau-nanoia naeta, Ke ana anene temanna ae moan te rabakau ni karau nanoia naeta.

⁶Te Atua, Ko na uru wiia raian aika unun aikai.

⁷A bia mauna nako n ai aron te ran ae raanga nako; A bia kamanatuaki n ai aroia uteute aika mena i nanon te kawai.[18]

⁸A bia riki ni b'atakataka ni mate rab'ataia n ai aron te ntabaniban; Ke n ai aron te merimeri are bungiaki ni mate ao e aki nora naba teutana ootan taai.

⁹A tiringaki kanga ai aroia uteute, n akea ataakina irouia mai m'aina: E na ukia nako te Atua ni korakoran unna ngkai a boni maiu.[19]

¹⁰Ane a na kakatonga aomata akana raoiroi n noriia akana buakaka ngkana a reke kaiia. Ane a na teboki waeia n raraaia akana buakaka.

¹¹Ane a na kaangai iai aomata, “Iai booni mwin aia m'akuri aomata akana raoiroi ae e na reke i rouia; bon iai te Atua ae te tia motika taekan aon te aba.”