Read Te B'aib'ara Taian Areru 63 Bible Online

Taian Areru 63 - Te B'aib'ara bible

Taian Areru 63

¹(Ana Areru Tawita; ngke e mena n rereuan Iuta) Te Atua, bon Atuau Ngkoe, I kakorakoraai n ukoukoriko; E kai nanou n tangiriko; kanga ai aron aontano ae m'auteretere ae e mate aona b'a akea te ran iai.

²N na noriko n am Tembora are Tabu, ao N na taratara aroni m'aakam ma mimitongim.

³E raoiroi riki am Atataiaomata nakon te maiu, Ma ngaia ae I riai n neboiko.

⁴N na katituaraoiko n ua tokin au bong ni maiu; N na tabeki rake baiu n tataro nakoim.

⁵E na rauaki nanou kanga n te am'arake ae kangkang; Ao N na anene ma te kukurei n neboiko.

⁶Ngkana I wene ni nneu ni wene, ao I uringko; I aki toki n iaiangoiko n te bong,

⁷i bukina ngkai Ko aki toki ni buobuokai. I anene ni kim'areirei i aan nuuni baim ni kiba.

⁸I nimnimtiko, Ao Ko tautauai ni baim ae m'aaka.

⁹A na mate akana kataia ni kani kamateai; Ane a na roko i aantano n aia tabo maate.

¹⁰A na mate n te kabaang, ao a na kanaki rab'ataia irouia kamea.

¹¹Ma e na kim'areirei te uea iroun te Atua; Ao a na kamoamoaa akana taetae n tuea n arana; Ma a na kainaki wiia akana atoatonga te kewe.