Read Te B'aib'ara Taian Areru 64 Bible Online

Taian Areru 64 - Te B'aib'ara bible

Taian Areru 64

¹(Te areru mairoun Tawita i bukin te tia kaira te katangitang.) Te Atua, Ko na ongo b'anaau, b'a ia rotaki n te kanganga. I makuia au kairiribai-kawakinai mai rouia.

²Kawakinai mairouia aomata aika buakaka aika bobotiia n iangoi m'akuri n aki ako.

³A riki aia taeka b'a kanga kabaang aika a kakangii raoi; Ao a bakarere nako aia taeka ni kamaraki nano b'a kanga ai aroni kanoani kainikatebe.

⁴A aki maaku ao a aki tab'ara ni bakarereia iai aomata aika akea aia bure.

⁵A kaungaia i bon irouia nakon nanoia n ribuaka; A i taetae irouia b'a a na katuka ia aia b'ai ni kam'am'ane, ao a kaangai, “Akea ae kona n norira.”

⁶A kario iango aika bubuaka ao a kaangai, “E a tia ara iango ni kakam'arua.” Nanon ao ana iango te aomata bon te kamimii.

⁷Ma E katebe nako ia kanoan ana kai ni katebe te Atua, Ao a kuba nako ngke a ikoaki iai.

⁸E na kamaunaia i bukin aia taeka akekei; Ao a na bane ni katoutou atuia akana noriia.

⁹A na bane ni maaku; A na iangoa te baere E a tia ni karaoia te Atua ao a na taekin nakoia aomata.

¹⁰A na kukurei aomata akana raoiroi, i bukini baike E a tia te Atua ni karaoi. A na kawakinaki raoi i rouna; A na bane aomata akana raoiroi n neboia.