Read Te B'aib'ara Taian Areru 65 Bible Online

Taian Areru 65 - Te B'aib'ara bible

Taian Areru 65

¹(Ana Areru Tawita; ana b'ai aia Mataniwi taan anene; te anene.) Te Atua, e bon riai iroura b'a ti na neboiko i Tion, Ao ti na kakoro bukin ara taeka ni bau

²i bukina ngkai Ko kaekai tataro. A na bane n roko nakoim aomata man taabo nako

³i bukin aia bure. Ti a aki konai moan ara bure, Ma Ko boni kab'arai naba.

⁴A kab'aia aomata ake Ko rineia, ake Ko kairiia b'a a na maeka i nanon on am Tembora. Ti na rauaki ni baika raraoi aika b'ain am Auti, are taiani kakab'aia i bukin am Tembora are Tabu.

⁵Ko anganira te tokanikai b'a kaekakira iroum, Ao Ko karaoi baika kamimii b'a ti aonga ni kamaiuaki iai. A bane ni mwioko iroum aomata nako i aon te aba ma ake a maeka i kiraroa ni katokini marawa.

⁶Ko katei maunga ni korakoram, are e a oti iai ae Ko rangi ni korakora.

⁷Ko katoka rurungaani marawa ma karongoaan b'aron naao; Ko katoki kiriweia botannaomata.

⁸A bane aomata nako i aonnaba ni mimi n am M'akuri ake a kamimii ake Ko a tia ni karaoi; Ao a karika te anene n takakaa ni kukurei irouia aomata mai tabon aonnaba nakon tabona are teuana.

⁹Ko kaota tararuan te aba iroum ni kab'akaan te karau; Ko kakorakora marina. Te Atua, e on am Karaanga n te ran; Ko karaoa ae e na kona aon te aba ni kariki aroka. Ao aio aroni karaoana iroum:

¹⁰Ko kab'aka te karau ae korakora n tawaana ake ana unikaki aoia ao ni kaboraoi tabuki bukina. Ko kamaraua raoi tanona n te karau, ao Ko kakab'aia te tano b'a e na kariki aroka.

¹¹Ai batiraa am Akoi ae noraki arona ni marin te aba ae Ko anga b'a e na taiaki! Iriani m'anangam bon te kab'aia ae bati n taabo ake Ko roko iai.

¹²A on taabo aika a rereua aoia n uteute aika maiureirei; Ao tabuki, ai aroia aomata aika kakatonga!

¹³A on aon taabo ake a maiureirei uteute iai n nanai n tiibu; Ao a kebo nanoni m'arua n uita. A riki b'a kanga ai aroia aomata ake a bane ni kanene b'anaaia n anene ni kakatonga.