Read Te B'aib'ara Taian Areru 66 Bible Online

Taian Areru 66 - Te B'aib'ara bible

Taian Areru 66

¹(Ana b'ai aia Mataniwi taan anene; te anene; te Areru) Kam na kanene b'anaami ni katituaraoa te Atua ma te kakatonga, ngkami aika aomata ni kabaneingkami.

²Kam na anenea taekan arona ae kamimii; aika E na karineaki riki iai arana!

³Kam na kaangai nakon te Atua, “Ai kamimiira am M'akuri aika Ko karaoi! E korakora M'aakam, ma ngaia ae a bobaraaki aiam i m'aim b'a a makuko.

⁴A bane aomata nako i aonnaba n taromauriko; A anene ni kamoamoako, A anene ni kamoamoa aram.”

⁵Kaaraki, noori baika kamimii, aika ana m'akuri te Atua i buakoia aomata.

⁶E kaoraa taari mani karikia b'a te aba ae m'auteretere; A nakonako ri nanon te karaanga ara bakatibu; Ti kukurei i rouna ngkekei i bukin ana m'akuri aika e a tia ni karaoi.

⁷E tautaeka n aki toki ni m'akana, Ao E tatarataraiia botannaomata nako. Ke a tai teirake akana rawa ni kan aantaeka i rouna n ekianako.

⁸Botannaomata, kam na karaoiroa Atuara; Ke e ongo te aba ni b'anaami n nebonebo.

⁹E a tia ni kateimatoai maiura, Ao E a tia ni kawakiniira b'a ti na aki b'aka.

¹⁰Te Atua, Ko a tia ni kataira b'a ti uara! Aron te tirewa ni kaitiakaki n te ai, ao ai bon arora naba ni kataaki b'a ti aonga n itiaki.

¹¹Ko kairira nako nanon te b'ai ni kam'am'ane, Ao Ko katokai baika rawaawata i aon akuura b'a uotara.

¹²Ko angania aiara te tokarira nako; Ti b'ainikirinaki kanga ai aroia aomata aika ri buakon te ai ma te ieka, Ma Ko kairira nakon te tabo ae ti na maiu iai.

¹³N na uoti karea ni kabuokaki nakon am Auti; N na anganiko baike I a tia n atong n au taeka ni bau.

¹⁴N na anganiko baike I a tia n atong ngke I taonaki n te rawaawata.

¹⁵N na anganiko te tiibu b'a e na kabuokaki b'a te karea i aon te baonikarea; N na anga kaom'aane ma kooti b'a karea, ao a na waerake bubuia nakoim.

¹⁶Nako mai, ongora, ngkami akana kam karinea te Atua, Ao N na tuangngkami te b'ai ae E a tia ni karaoia i buku.

¹⁷I weteia b'a E na buokai; I anene ni kamoamoaa.

¹⁸Ngke arona b'a I a kamani katinanikui taekan au bure, Ao E na bon aki ongo irou te Uea.

¹⁹Ma E a bon tia n ongo irou te Atua, Ao E kaeka b'anaan au tataro.

²⁰E na karaoiroaki te Atua, b'a E aki riba au tataro ao E aki toki ana nanoanga nako iu.