Read Te B'aib'ara Taian Areru 71 Bible Online

Taian Areru 71 - Te B'aib'ara bible

Taian Areru 71

¹Te UEA, I nakoim b'a N na kamanoai iroum; Tai kariaia b'a N na reke irouia taan ribaai!

²Ko na buokai ni kamaiuai i bukina ngkai Ko raoiroi. Ongo irou ao kamaiuai!

³Ko na riki b'a nneu ni katantan ae mano raoi ae N na kakawaria, ao au nono ae matoatoa [24] b'a nneu ni kamanoai; Boni katanau ao otangau Ngkoe.

⁴Atuau, kamaiuai mairouia aomata aika buakaka; Kamaiuai b'a N na aki reke i aani m'akaia aomata aika iowawa ma n aki ako.

⁵Te UEA ae ko tautaeka, e tiku au kaantaninga iroum; I mwioko iroum ma ngke te kairake ngai.

⁶E mena mwiokoni maiu iroum mai moana ni karokoa tokina; Ko a tia ni kakaawakinai man te tai are bungiaki iai. N na neboiko n taai nako.

⁷E a riki maiu b'a te banna ni katoto nakoia aomata aika bati, i bukina b'a Ko a tia n riki b'a te tia kamanoai Ngkoe ae matoatoa.

⁸I kakamoamoako n tataekina mimitongim ni kabongnga.

⁹Ko na tai ribaai ngkai I a kara; Ko na tai kitanai ngkae e a kab'ara rikaaki rab'atau.

¹⁰A taekinai au kairiribai; A ikotaki ni maroroakina aroni kam'aneau b'a a na kamateai.

¹¹A taku, “E a tia te Atua ni kitanna; ti na ri mwina n taua; akea ae na kamaiua.”

¹²Te Atua, tai kararoako mairou; Atuau, tai tab'ara ma nako mai buokai!

¹³A bia konaaki ma ni kamaunaaki aomata akana ekai nako. A bia kamaamaaeaki ma ni kab'ainrangaki aomata akana kani kaikoakai.

¹⁴N na kakantaningaiko n taai nako; N na kakabatiaa m'aitin neboam.

¹⁵N na aki toki n tataekin taekani baika raraoi ake Ko a tia ni karaoi, ma taekani kamaiuaia am Aomata iroum, e ngae ngke e ri aon au atatai.

¹⁶N na nako ni korakoran te Atua ae te UEA; N na tataekina taekan am M'akuri aika raraoi, aika ti am M'akuri.

¹⁷Te Atua, Ko reireiai ma ngke te teei ngai; Ao I teimatoa ni kakarakin taekan am M'akuri aika Kamimii ni karokoa ngkai.

¹⁸Te Atua, tai kaaki taekau ngkai I a kara ao e a iaia iran atuu! Ko na raonai n au tai n tataekin am M'akuri ake ab'ab'aki ma ni kamimii nakoia roroo nako aika na roko.

¹⁹Te Atua, e roota karawa am Raoiroi. Ko a tia ni karaoi m'akuri aika ab'ab'aki; Akea temanna ae ai arom.

²⁰Ko a tia ni karoko kaangaanga i aou ma baika I a tia ni karawaawataaki iai, Ma Ko na manga kaoka nako iu marurungiu; Ko na kawakinai man te ruanimate.

²¹Ko na karakaa karineau; Ko na manga kakukureiai riki.

²²Atuau, Ko kakaonimaki nakoia am Aomata; Ma ngaia ae N na anene ma te b'ai ni katangitang n neboiko. N na katang anene n au b'ai ni katangitang nakoim, Ngkoe ae Atuaia Iteraera ae Tabu.

²³N na kanenea b'anaau n anene ni kakatonga n au tai ni katangitang i bukim; N na anene ma nanou ni koaua i bukina b'a Ko a tia ni kamaiuai.

²⁴N na tataekin n taai nako taekani baika raraoi ake Ko a tia ni karaoi, i bukina b'a a tia ni konaaki ma ni kab'ainrangaki aomata ake a kataia ni kani kam'aruaai.