Read Te B'aib'ara Taian Areru 73 Bible Online

Taian Areru 73 - Te B'aib'ara bible

Taian Areru 73

¹(Ana Anene Ataba) E koaua ae e raoiroi te Atua nakoia Iteraera, nakoia ake a itiaki nanoia.

²Ma e kuri ni bua au kaantaninga; E kaan ae na toki au onimaki

³i bukin nanobwiu irouia ake a kainikatonga ngke I noori b'aai b'a a nako raoi i bukiia aomata aika buakaka.

⁴A aki mate ni maraki; A marurung ao a maiu raoi rab'ataia.

⁵A aki rotaki n te rawaawata n aia aroia aomata tabem'aang; A aki kaitibo ma kaangaanga n ai aroia tem'angina.

⁶E riki te kainikatonga b'a kanga ai aron m'aen roroaia; ao te kakam'arua b'a kunnikaia;

⁷A oti nako baika buakaka mai nanoia; Ao akea te bae a iaiangoia b'a ti te kario kaantaninga aika bubuaka.

⁸A ngareakiniia aomata tem'angina ao a atoatong taeka aika aki raraoi; A kainikatonga ao a kario iango n ribuaka b'a b'ain ekakinakoaia tem'angina.

⁹A tabeki taeka aika buakaka b'a taekan te Atua are i karawa; Ao a tataetae n aki akaaka i aon te aba,

¹⁰n te aro are a ongo aomata irouia ao a ingainga nanoia ni kani kakoauai taeka ake a atong.

¹¹Ao a kaangai, “E na aki ataia te Atua; E na aki kona ni kunea te Atua are Moan te M'aaka.”

¹²Anne aroia aomata aika buakaka. A bati aia b'ai ao a aki toki ni karereke aika bati riki.

¹³E boni matebuaka kawakinau b'a N na itiaki, N akea te bure ae I karaoia.

¹⁴I karawawataaki n te bong koraki; E karekeaki kaiu ni katoa ingabong.

¹⁵Ngke arona b'a I a tia n atong taeka akanne, Ao I a tia n aki riki iai b'a temanna i buakoia am Aomata.

¹⁶I kataia n iaiangoa aron te kaangaanga aio, Ma boni moan te kaangaanga irou

¹⁷ni karokoa are I rin nako n am Tembora; Ao I a ataa ngkanne iai te bae e na riki nakoia aomata akana buakaka.

¹⁸Ane Ko na kaakiia n te tabo ae kamaranran, Ao Ko na kab'akaia n ototoiia!

¹⁹A mate nabangkekei; A roko n tokiia ae kakamaaku.

²⁰Ti te bo ngaiia ma te mii are toki kaotina n te ingabong; Ngkana Ko uti, Te UEA, ao a mauna naba.

²¹Ngke e rawaawata nanou, n ai aron ae e teke burou iai,

²²E roo nanou, ao I aki ataib'ai, Kanga ai aron te man ngai i matam.

²³Ma ae I bon memena naba i rarikim n taai nako, Ao Ko tautaua baiu.

²⁴Ko kairiirai n am Taeka n Reirei, Ao Ko na m'aneai rimwi nakon te neboaki.

²⁵Akea riki temanna i karawa ae na buokai b'a ti Ngkoe; Ao akea riki temanna i aonnaba ae I tangiria i rarikim.

²⁶E kona n rikirake ni mamaara nanou ma rab'atau, Ma bon te tia kakorakoraai te Atua, ao ti Ngaia ae I kainanoia.

²⁷A na kabuanib'ai maiuia akana kitaniko; Ko na kamateia akana aki kakaonimaki nakoim.

²⁸Ma ngai, e raoiroi irou te kaania te Atua. B'a I rineia b'a te tia katanai, N na katanoatai b'aai ni kabane ake E a tia ni karaoi.