Read Te B'aib'ara Taian Areru 81 Bible Online

Taian Areru 81 - Te B'aib'ara bible

Taian Areru 81

¹(Ana b'ai aia Mataniwi taan anene: n te b'ana ae Gittith; ana Areru Ataba) Kam na anene ni kim'areirei nakon te Atua ae otangara; Kam na anene ni kakatonga nakon Atuan Iakob'a.

²Tabeka te anene ao katanga te timbere, ma te aabi ae kamaiu tangina, ma te raea.

³Katanga te bu i bukin te bootaki ae ab'ab'aki are te Toa ae Moan Otin Nam'akaina ao ngkana e a tanimainiku.

⁴Aio te tua i Iteraera, ae roko mairoun Atuan Iakob'a.

⁵E anganiia te botannaomata ae Iteraera ngke E eekaanako te aba are Aikubita. I ongo te b'ana ae I aki ataia b'a antai b'anaana, ae kaangai,

⁶I anai uotami aika rawaawata mai aon akuumi, Ao I kainaomataingkami mani m'akuri aika mamatoa.

⁷Ngke kam reke n te kaangaanga, ao kam weteai ao I kamaiungkami. I buokingkami man au tabo ni karabai are n te angibuaka ma te baa. I kataingkami i rarikini koburaken raan i Merib'a.

⁸Au botannaomata, kam na ongora i Rou b'a kam kaawa ngkana kam aki; Iteraera, kam bia ira nanou n ongora irou!

⁹Bon akea naba te atua temanna ae na mena i buakomi, ao kam na bon aki taromauria naba teutana.

¹⁰Bon te UEA Ngai ae Atuam, ae I kairiko ni kaotinakoko mai Aikubita. Kaurea wiim ao N na kaam'arakeko.

¹¹“Ma e aki kan ongo irou au botannaomata; Iteraera e aki kan ongeaba naba.

¹²Ma ngaia ae I kariaia b'a a na iri nanoia aika matoatoa, ni karaoi baike a tangiri.

¹³Bon au kaantaninga b'a a bia ongo irou au botannaomata! A bia ongotaeka irou!

¹⁴Ngkana a konaa, ao N na katae aia kai aia kairiribai n te tai ae waekoa: N na ekianako nako aiaia.

¹⁵A na bobaraaki i matau ma te maaku te koraki akana ribaai; A na karawaawataaki n aki toki.

¹⁶Ma N na kaam'arakeingkami n te uita ae moan te raoiroi; Ao N na kanuaingkami n aia karewe manibeeru.”