Read Te B'aib'ara Taeka n Rabakau 1 Bible Online

Taeka n Rabakau 1 - Te B'aib'ara bible

Taeka n Rabakau 1

¹Aikai ana taeka n rabakau te Uea are Toromon are mai Iteraera, are natin Tawita te m'aane.

²E na reireiningkami Taeka n Rabakau te wanawana ao te aroaro ae e raoiroi ma aromi n ataa nanon taeka aika a nano.

³Kam na reirei ataan te raoiroi ao te maiu ae e eti.

⁴E na konaa te aomata n aki akaaka n reireinna arona ae e na taraa raoi iai, ao a na konaa rorobuaka n ataei ni karekea te rabakau ao te iango ae e tamaroa.

⁵Ngkana kam'aa kaman wanawana, kam na manga wanawana riki. Ao ngkana kam birikatai, ao kam na manga rabakau n ataib'ai,

⁶taeka n rabakau ma taeka n reirei, ao ai uana naba ma taeka ni wanawana ao aekaki n taeka ni karariki ni kabane.

⁷Karinea ao ongotaeka iroun te UEA! Aio bon moanan te rabakau.[1] Bon te nanobaba ane e aki butim'aea te wanawana ma te reirei.

⁸Natiu, ko na ongotaeka nakon reireiam mairouia am karo,

⁹ao katokaa i aom taian reirei kaanga ai aron te b'ara ae e taatangiraki ke te m'ae n roroa ae e rangi n tamaroa.

¹⁰Ko na aki kaririiaki irouia taani bure ke n ongo

¹¹ngkana a kaangai, “Nakomai! Ti a katea ara kaeng ao ti a tiringiia aomata b'a ti na ngare iai!

¹²A kaub'ai ma ni marurung raoi ngkai ma ti na tiringiia ti n te tai aei ao akea riki.

¹³Ti na anai aia b'ai aika a kakaawaki ao ti na kaoni iai mwengara n taiani b'ai ni kimoa.

¹⁴Ngkana ko ira ara kaeng, ao e na reke tib'am.”

¹⁵Ko na aki iririia aekaki n aomata akanne ke ni karaoi baika a karaoi.

¹⁶A rangi ni waekoakoa nakon karaoan te bure, ni karokoa naba bon te tiritiri.

¹⁷Ti te bo ngaiia ma taiani mannikiba ake a noora te abea, ao a aki kubara te kainikab'aru. [2]

¹⁸A ikoikotaki n tiringa te aomata ma bon taani m'ane rimoa ngaiia.

¹⁹Te kaub'ai are ko karekea man te bure e na manga bon iraeiko mani maiumi.

²⁰E takaarua te Wanawana [3] i nanon kawain nuukan te kaawa ike a m'aiti iai aomata.

²¹Kaanga te aine ae e takaarua n taabo ni boob'ai ao i rarikin mataroan te kaawa ae e kaangai nakoia aomata,

²²“Tao maanra riki ngkami ni kukurei ni maiumi ae e nanobaba? E aera ngkai kam aki katoka te kakaniko ma ngareakinan te rabakau?

²³Ongora ngkana I boaingkami ma n tuangkami te b'ai ae I iangoia.

²⁴Kam aki kubarai ao kam aki kan ongo;

²⁵Kam katinanikui au taeka n reirei ao kam aki tabe ngkana I kauringkami.

²⁶N na b'ainingareingkami ao N na kamamaaeingkami ngkana kam oreaki n tabeua

²⁷taian aoraki aika a korakora, ke ngkana a otab'aniniaki n taian kangaanga ma karawaawata aika kaanga taian angibuaka.

²⁸Kam na buubuti buokami mairou, ma N na bon aki kan ongo; kam na ukeuke, ma n na bon aki reke iroumi.

²⁹Eng, e na bon akea te b'ai ae kam na ataia, ao kam na bon rawa ni karinea te UEA.

³⁰Kam katinanikua au taeka n reirei ao kam aki kan ongo ngke I kauringko.

³¹“Ngkai kam nang boni kana uaan te b'ai ae kam a tia ni karaoia ni karokoa te tai are kam a onrake n te b'ai ae kam a tia ni baaireia.

³²E na karokoa te mate te bure ma te kamoamoa nakon te nanobaba n rangirang.

³³Ma ngkana kam ongo irou, ao kam na bon mano man taiani kabuanib'ai aika a kakamaaku.”