Read Te B'aib'ara Taeka n Rabakau 10 Bible Online

Taeka n Rabakau 10 - Te B'aib'ara bible

Taeka n Rabakau 10

¹Aikai tabeua ana taeka n rabakau Toromon: A kakukureia aia karo ataei aika a iangoraoi, ma a karawaawataaki nanoia irouia ataei aika a nanobaba.

²Bon akea buokam ae e na anganiko b'aai akana kam karekei mani karaoan m'akuri aika a buakaka, ma karaoan ae e raoiroi [13] e na boni konaa ni kamaiuko man te mate.

³Ngkana kam ongotaeka iroun te UEA ao kam na bon aki konaa ni baki, ao ngkana kam buakaka, ao e na bon aki anganiko te Atua te b'ai ae kam tangiria

⁴E kairiko te taningaroti nakon te kainano, ao e na karekea kaub'aim te m'akuri ae e matoatoa.

⁵E rangi n nakoraoi te m'akuri korakora n tain te tai ma bon te nanobaba ngkana e matu te aba.

⁶A bane aomata n neboia aomata aika a raoiroi, ma a karabaia aika a buakaka i akuun aia taeka aomata aika a buakaka.

⁷A aki toki n ururingaki aomata aika a raoiroi e ngae ngkana a maan nako, ma a kai m'anuokinaki aika a buakaka.

⁸Ngkana iai te iangoraoi iroum ao kam na kakauongo ma n ongotaeka, Ngkana kam rangi ni b'aab'arantiko, ao kam bon uruana aromi i bon iroum.

⁹Kam na maiu ngkana kam kaakaraoa ae e raoiroi n taai nako ma kam na reke, ngkana e aki raoiroi maium.

¹⁰E karekea te kangaanga te kam'aam'ane, ao te taetae n nanobaba e na karokoa te urub'ai.[14]

¹¹Aia taeka aomata aika a raoiroi bon boton te maiu, ma a karabaia aika a buakaka i akuun aia taeka aomata aika a buakaka.

¹²E karikirakea te kiriwe te riribai; ao e aki noora te kaairua ae a karaoia tabem'aang te tangira.

¹³Ngkana kam iangoraoi, ao e na oti ngkana kam taetae. Ma ngkana kam nanobaba, ao kam na oreaki n te kai.

¹⁴Ngkana kam iangoraoi, ao kam na karekea te rabakau n aron ae kam konaa, ma e na waekoa n uruana arom te taetae n nanobaba.

¹⁵E konaa n riki b'a te nono te kaub'ai ae e korakora ma bon akea otangam n te maiu ni kainano.

¹⁶Ngkana kam maiuakina te eti, ao te kaniwanga bon te maiu ae e raoiroi ma ngkana kam maiuakina te buakaka ao akea riki te b'ai ae kam karekea b'a ti te bure.

¹⁷Kariaia boaakimi, ao ane kam na kunea te maiu; ngkana kam aki kariaia boaakimi, ao ane kam na tibanako man te kawai.

¹⁸Kam konaa ni karabaa nanomi ni kairiribai ngkana kam taekina te kewe, ma bon te nanobaba ngkami ngkana kam touakina te kewe.

¹⁹Ane e na kaairua ami rongorongo ngkana kam rangi ni kabatia ami b'arantiko ma ngaia ae, kam riai n iango raoi ma n taratara raoi n te b'ai are kam taekinna.

²⁰Ana taeka te aomata ae e raoiroi kaanga ai aron te tirewa ae e itiaki, ma ana iango te aomata ae e buakaka boni b'aai aika akea bonganaia.

²¹A m'aiti aika a buokaki n taian taeka n reirei aika a manena, ma a tiringaki taian nanobaba ni bon oin nanobabaia.

²²Ngkana e kakab'aiaingkami te UEA n taiani kaub'ai, ao bon akea te b'ai ae kam na raraomaeakinna.[15]

²³A kukurei taian nanobaba ni karaoan te kaairua, ma a bane aomata nako aika a iangoraoi ni kukurei ni karaoa te m'akuri ma te wanawana.

²⁴Te b'ai ae a rangi n raraomaeakinna aomata aika a buakaka e na manga bon riki nakoia, ma aomata aika a raoiroi a na karekea te b'ai ae a rangi ni iaiangoia.

²⁵A na mauna nako aomata aika a buakaka aikai a ngkana e roko te angibuaka n oroia, ma e na kaawakiniia ni kabane aika a ongotaeka i rouna te Atua.

²⁶Te aomata ae e taningaroti n tain te m'akuri kaanga ai aron te wii ae e onrake n te beneka ke te mata ae e manga n te bubu.

²⁷Ngkana kam karinea te UEA, ao e na bon anaanau maiumi, ngkana kam teimatoa ni kaakaraoa ae e kaairua, ao e na koreaki ni kauarerekeaki maiumi.

²⁸Ngkana kam ongotaeka iroun te UEA, ao kam na kukurei, ma bon akea kanoan aia bong aika a na roko aomata aika a buakaka.

²⁹E kaawakiniia ni kabane aomata aika a maiuakina te raoiroi te UEA, ma e uruana aroia akana a karaoa ae e bure.

³⁰A na tei ni matoatoa aomata aika a raoiroi, ma a na bua abaia aomata aika a buakaka.

³¹A taetae ma te iango raoi aomata aika a raoiroi, ma a na kainab'aabu taani kam'aam'ane ni kewe.

³²Ngkana kam ongotaeka iroun te UEA ao kam na ataa te b'ai ae kam riai n taekinna n taai nako. Ma bon akea ae e na onimakiningkami ngkana kam taekina te kewe.