Read Te B'aib'ara Taeka n Rabakau 12 Bible Online

Taeka n Rabakau 12 - Te B'aib'ara bible

Taeka n Rabakau 12

¹Kam wanawana ngkana kam kariaia kaetakim, ao ngkana kam rawa ao kam bon nanobaba.

²E tangiriia aomata nako te UEA akana a maiuakina te raoiroi, ma e katuaaia aomata nako akana a karaoi taiani babaaire aika a buakaka.

³E aki konaa n reke te teimatoa man te bure! ma ngkana kam maiuakina te raoiroi, ao kam na kateimatoaki kaanga ai aron te aroka ae e nene wakaana.

⁴Bon te atiibu ae e tamaroa nakon buuna te ainenum'a ae e i buobuoki ma te ainenum'a ae e kamamaaea buuna e na bon kamkaa riin buuna.

⁵A iango n akoi aomata aika a raoiroi, ma kam na bon aki onimakina ana reirei te aomata ae e buakaka.

⁶Te reirei ae e buakaka bon te kainikab'aru ae e kamaamate, ma te reirei ae e raoiroi kaanga ai aron te otanga.

⁷N te tai are a konaaki iai aomata aika a buakaka ao ai bon anne naba tokiia n aki toki, ma bon akea ae e ongotaeka iroun te Atua ae e na karenakoaki.

⁸E manena te iangoraoi n te nebonebo, ma te nanobaba bon te kamaraia nakoia aomata aika a nanobaba.

⁹E raoiroi riki ngkana boni kaangai naba ngkami b'a ti temanna ami tia m'akuri [20] nakon ae kam na iangoia b'a kam rangi ni kakannato ao kam a mate ni baki.

¹⁰A akoi aomata aika a raoiroi nakoia aia man, ma e iowawa te aomata ae e buakaka.

¹¹A m'aiti i aon ae e riai kanaia taani ununiki aika a m'akuri korakora, ao taani mimiiroaroa boni kaanga taian nanobaba aika a kabitaia.

¹²E kataia ni karabaa te aomata ae e buakaka i akuun te buakaka; [21] kaanga ai aron taian aroka aika a nene wakaaia aomata aika a raoiroi.

¹³Ti boni kam'aneira i bon iroura ngkana ti taekina te kewe, ma ngkana ti maeka ma te raoiroi ao ti bon kararoaira iai ma te kiriwe.

¹⁴Ti bon anganaki kaniwangara ke ti katuaaeaki ni b'aai ake ti taekin mani karaoi.

¹⁵A taku aomata aika a nanobaba b'a e raoiroi maiuia, ma e kakauongo raoi nakon taeka n reirei te aomata ae e iangoraoi.

¹⁶Bon te aro n nanobaba te aki konaa n taotaona unim; ao te aro ni wanawana aki tabeakinan te kamaamaaeaki.

¹⁷E taekina te koaua n te bowi te aomata ae e raoiroi, ma bon akea te b'ai ae e na taekinna te aomata ae e buakaka b'a ti te kewe n taai nako.

¹⁸E korokoro kaanga te kabaang te taeka ae akea nanoia, ma e kamaiua te aba te taeka ni wanawana.

¹⁹Bon akea tokin te koaua, a na bon waekoa n ataaki taiani kewe.

²⁰E rangi ni kam'aam'ane te nano ae e b'anga ni kewe, ma e uota te kukurei te iango ae e tamaroa.

²¹A aki konaa n reke n te kangaanga aomata aika a raoiroi, ma a rangi ni m'aiti aia kangaanga aomata aika taani kakiriwe.

²²E ribaia taani kewe ni kabane te UEA ma bon raoraoia aomata ni kabane aika a onimakinaki.

²³Kam na iangoraoi ao tai taekin b'aai ni kabane akana kam atai b'a bon taian nanobaba aika a touakina te aro n nanobaba nakon taabo nako.

²⁴M'akuri korakora, ao ane kam na riki b'a taani kairiiri; taningaroti, ao ane kam na riki b'a toro.

²⁵Te raraoma bon te uota ae e rawaawata, ma e uota te kukurei n taai nako te taeka ae e akoi.

²⁶E raoiroi riki ngkana kam karaoa ae e raoiroi, nakon ae kam na kabua kawaim ni karaoan te kaairua. [22]

²⁷Ane e rangi n taningaroti ni kuuka e na bon mate ni baki, ma ane e m'akuri korakora bon te kaub'ai ngaia ae moan te kakaawaki. [23]

²⁸Ira te kawai nakon te maiu ao ane kam na aki katabeaiangaaki n te mate.