Read Te B'aib'ara Taeka n Rabakau 19 Bible Online

Taeka n Rabakau 19 - Te B'aib'ara bible

Taeka n Rabakau 19

¹E raoiroi riki te maiu ni kainano ma te maiu ae e raoiroi nakon te nanobaba ae e b'anganikewe.

²A aki konaa ni kaai n airi te kani b'aib'ai ma te bangab'ai. E na aki reke iroumi te kawai ngkana kam rangi ni ienikuri.

³Ti bon uruaki bon i bukin bangab'aira, e ngae ngke ti bukina te UEA.

⁴A m'aiti raoraon te kaub'ai; ao akea raoraon te kainano.

⁵A bon aki konaa ni biri nako ma te katuaaeaki taani kakoaua aika a aki taekina te koaua ma taan b'anganikewe.

⁶A bane aomata ni kan raoraonaki irouia aika a konaa ni buokia.

⁷Ngkana kam kainano, ao ane a na katinanikuingkami akana bon am koraki, ao a na rangi ni buakaka riki nakoim ake raraom ngkoa. A na aki reke iroum ngkana kam kainanoia, [30]

⁸Karaoa ae e raoiroi bon nakoim ni b'aina te iangoraoi ao kam na kukurei iai.

⁹A na uruanaki aroia taan kakoaua aika a aki karaoa ae e riai ma ni b'anganikewe.

¹⁰E bon aki riai b'a e na maiu ni kaub'ai te aomata ae e nanobaba ke te toro ae e tautaeka i mwiin te uea.

¹¹Kam wanawana ngkana kam b'aina te taotaonaki n nano ma ni kaotia b'a aekakira ngkami ni kab'araan aia bure tem'angina.

¹²E bekorara kaanga te raian te uea ane e unun, ma e riki b'a kaanga te aoi i aon taian uteute, te uea ngkana e kukurei.

¹³e uota te kamaamaaeaki nakon tamana te nati ae e nanobaba. Te aine ae e meremere n taai nako boni kaanga timtim ni karau ae e teimatoa ni b'aka.

¹⁴Kam na b'aib'ai ni b'aai ni kabane akana kam b'ain mairouia am karo, ma te aine ae e iangoraoi bon te b'aintangira mairoun te UEA.

¹⁵Kam na mate ni baki ngkana kam taningaroti ma ni kabanea ami tai n nimatutuu.

¹⁶Ongotaeka nakon ana reirei te UEA ao ane kam na maiu ngkana kam aki ongotaeka ao ane kam na mate.

¹⁷Tararuaakin te kainano bon te angab'ai nakon te UEA, ao ane kam na manga kabooaki raoi.

¹⁸Kaetiia natim b'a kam kaawa n rangi n ooimwi; ngkana kam aki katuuaia, kam bon uruana aroia.

¹⁹A aki toki n reereke n te kangaanga aomata aika nanorieta, ao a aki toki n tatangira buokaia.

²⁰Karekea inanom taian taeka n reirei kariaia kaetakimi, b'a kam aonga ni konaa ni maiu ma te iangoraoi.

²¹Ti konaa ni karaoi ara babaaire aika a bati, ma e na bon karaoa are e bon baaireia te UEA.

²²Te b'ai ae e rangi ni kakaawaki bon te kakaonimaki. E raoiroi riki ngkana kam maiu ni kainano nakon te riki b'a te tia kewe.

²³E uota te maiu ni koaua kaotakin karinean te UEA ngkana kam karaoia, ao kam konaa ni motirawa n aki manga maaka te kabuanib'ai.

²⁴A rangi n taningaroti naba aomata tabem'aang n tabeki baiia ni karei wiia n am'arake.

²⁵A karekei wanawanaia aomata aika a bangab'ai man noorakin katuaeakiia tem'angina; e reireinna arona te aomata ae e iangoraoi ngkana e kaetaki.

²⁶A iraea tamaia mani kakioa nako tinaia naati aika a kamamaaea te aba.

²⁷Ngkana kam katoka te reirei, ao kam na m'aninga te b'ai ae kam a tia n ataia.

²⁸E b'ainingarea waakin te kabowi te tia kakoaua ae e b'anga ni kewe, a taku n ana iango taani bure b'a te b'ai ae raoiroi karaoan te bure.

²⁹A bane taian nanobaba n tataningaa katuaaeaia.