Read Te B'aib'ara Taeka n Rabakau 22 Bible Online

Taeka n Rabakau 22 - Te B'aib'ara bible

Taeka n Rabakau 22

¹E kakaawaki riki te aroaro ae e raoiroi ao te karineaki nakon te tirewa ma te koora.

²A kaai ni karikaki iroun te UEA te kaub'ai ma te kainano.

³Ngkana kam noora te kangaanga ae e roko ao tai nanobaba ni m'ananga ni kainetia kaiangoraoiko ao karabako mai iai.

⁴Karinea te UEA ao m'akuri i bukina! Kam na anganaki te kaub'ai, teimatoan te maiu, ao te karineaki b'a kaniwangami

⁵E m'ananga i nanon te kawai te aomata ae te tia kewe ao e onrake n taiani b'ai ni kam'ane aika a kateketeke. Kararoako mai iai!

⁶Reireiniia natim ae e raoiroi, ao ane a na teimatoa n kaakaraoa ae e raoiroi ngkana a ikawai.

⁷A tautaekanaki aika a kainano irouia aika a kaub'ai, bon taian toro irouia taan kataarau, aomata aika taan tangob'ai.

⁸A reereke n te kangaanga taani kakiriwe, ao a tiotionako i bukin buakakan nanorietaia.

⁹E kakab'aiaia aomata nako te UEA akana a anga te am'arake n akea boona nakoia aomata aika a maiu ni kainano.

¹⁰A na manga roko n tokiia te ngurengure ma te un, ngkana kam kakioia nako aomata aika a kauniia tem'angina.

¹¹Bon raoraoia aomata ni kabane aika a raoiroi aika a taetae n akoi te uea.

¹²E tarataraia aomata nako aika a iangoraoi te UEA, ma e aki kakoroi aia babaaire taani kam'anea te aba aika taani kewe.

¹³Tai taningaroti n te aro are ko na kaangai, “I a aki nako ni m'akuri n au buakonikai b'a e kaawa ni kanai te raian!”

¹⁴Ti te bo ana taeka te aine ae e buakaka ma te m'anono ae e nano; kam na b'aka nako nanona ngkana kam kauna te UEA.

¹⁵A bane n nanobaba naati ma e na kawanawanaia kaetakiia ae e matoa.

¹⁶Kam ruuti ngkana kam kewea te aomata ae e maiu ni kainano ke kam anga te b'aintangira nakon te kaub'ai.

¹⁷Aikai taian taeka n rabakau tabeua mairouia aomata aika a wanawana, ma ngaia ae kakauongo raoi nako iai ngkana I reireiningkami.

¹⁸Kam na boni kukurei b'a kam atai taian taeka n rabakau aikai ao kam a konaa n taekin man ami ururing.

¹⁹I reireiniia n te bong aei, b'a a aonga n onimakina te UEA.

²⁰I a tia ni koroi tenibwi taian taeka n rabakau aika a on n taeka n reirei aika a tamaroa.

²¹Kam konaa n onimakiniia b'a ngaia aika a na anganiko taeka aika a eti nakoia akana a tabeakiniko.

²²Kam na aki karekea aromi mairoun ae e maiu ni kainano ke ni kam'aneia n te kabowi.

²³Bon te UEA te tia tei i bukiia, ao te b'ai are kam karaoia nakoia, e na manga karaoia nakoimi.

²⁴Kam na tai iraorao ma aomata aika a nanorieta.

²⁵Kam na manga katotoongia ma n reke n te b'ainikam'ane.

²⁶Kam na aki anga ami b'ai teuana i bukin kab'araan ana taarau te aomata temanna.

²⁷E na bua ami kainiwene ngkana akea ami m'ane.

²⁸Kam na tai kam'ainga te tia [34] are e a tia ni kaweneaki irouia ami bakatibu.

²⁹Ngkana kam karaoa raoi ami m'akuri, ao kam bon m'akuri iai i bukin te tia tautaeka ao kam na bon aki manga riki b'a te toro.