Read Te B'aib'ara Taeka n Rabakau 23 Bible Online

Taeka n Rabakau 23 - Te B'aib'ara bible

Taeka n Rabakau 23

¹Ngkana kam kaoaki b'a kam na am'arake ma te uea, ao kam na karaoa kateimi ae ami kabanea n raoiroi.

²Kam na aki nako ni katibutauako! bon ti te bo anne ma kam bon korea roroam i bon iroumi.

³Kam na aki m'angainrang n taraan am'arake ni kabane aika a kangenge taraaia! A na bon aki rangi ni kangkang.

⁴Kataia b'a kam na aki riki ni kaub'ai

⁵E na kibanako ami m'ane i m'aain ae kam a ataia, n ai aron te ikare ae e karina ni kiba nako.

⁶Tai kariaia te kakao n nako ni kana kanan te aomata ae e b'angantauti e aoria ngkana e rangi n raoiroi kanana.

⁷B'a aomata aika aron aikanne a tabe ni wawareka m'aitin ae kam a tia ni kanna.[35] A na kaangai, “Anai ni kabane akana kam bon taku!” ma a bon aki nanona ane a taekinna.

⁸E na manga oki kanam ane kam kanna, ao a na bane buaka ami taeka n akoi ni kabane.

⁹Tai taetae nakoia aika a nanobaba ane a na ti b'ainingareingkami.

¹⁰Tai kam'ainga te tia [36] ke n anaa te aba ae aban te teei ae akea tamana ma tinana.

¹¹E mena te Atua ae Moan te M'aaka ikanne ni kaawakiniia ao ni kaitarako.

¹²Kakauongo nakon taian reirei ao kabanea korakorami ni kamateb'aia.

¹³Tai b'arannano ni kaetiia natimi nako. Kam aki tiringiia ngkana kam matoatoa nakoia,

¹⁴b'a a na bon kamaiuia.

¹⁵Natiu, ngkana kam kaota te wanawana ao n na bon kukurei,

¹⁶ao n na kim'areirei raoi ngkana kam b'aab'aina te koaua.

¹⁷Tai mataaiakiniia taani bure, ma karinea te Atua n taai nako.

¹⁸Ao ane e na reke iroumi te kaantaninga ni koaua i bukin boong aika a na roko.

¹⁹Kakaauongo raoi irou, natiu! Kawanawanaingkami ao kaiangoraoingkami n ira te kawai ae e eti.

²⁰Tai riki b'a te tia mamanging ke te tia mamauam'arake.

²¹E na anganingkami te nimatutuu, ao kam na riki b'a te aomata ae e maiu ni kainano ae e ti kunnikainna n te kunnikai ae e mangaingai.

²²Kam na ongo iroun tamami, ao tai ribaa tinami ngkana e a kara.

²³Kabooa te koaua ao te wanawana, te taeka n reirei ao te iangoraoi, ao tai raraaure nako ma ngaiia.

²⁴Kakukureia raoi tamami ni maiumi aika a raoiroi ao ni kaota te motikitaeka ae e raoiroi.

²⁵Karaoia ami karo b'a a na kamoamoa iroumi, ai moara ra riki tinami.

²⁶Natiu te m'aane, kakauongo raoi, ao kukurei ni katotoongai.

²⁷Bon ti te bo aine aika a buakaka ao ainenum'a aika a aki kakaonimaki ma te m'anono ae e nano

²⁸a tatauraoi nakon buakanakim kaanga aroia te koraki ni kimoa n raweia konaia temanna i mwiin temanna.

²⁹Antai ae e aki toki n reereke n te kangaanga? Antai ae e aki toki ni ngurengure ma n un? Antai ae e m'akorokoro ma ni kunikun? Antai ae e takarokaro matana?

³⁰Bon aomata ni kabane akana kakab'akanako tai, n taua riki teuana te m'angko ni manging.

³¹Ko na bon aki karekea nanom n taraia ngkai e on ma ni kantara ma ni buroburo i nanon te m'angko te kiraati te wain! E rin raoi nimakina

³²ma i mwiina teutana, e na tena kaanga te naeta ae e boitin.

³³Ko na noori b'aai aika a kamimii, ao ane e nang uotiko nanom nakon taiani kangaanga.

³⁴Ko na minominotaki kaanga te aomata ae e kataia ni matu i aon te kaibuke n taini buakan nanoni marawa.

³⁵E na kunkun rab'atam n aki akaaka ao ko na aki konaa n uringnga b'a e kangaa n riki. Ao ko na wene n aki matu ma n titiraki ni kaangai, e na ngaina n ningai, b'a I aonga ni manga nako riki ni mooi?”