Read Te B'aib'ara Taeka n Rabakau 29 Bible Online

Taeka n Rabakau 29 - Te B'aib'ara bible

Taeka n Rabakau 29

¹Ngkana ko teimatoa ni bonotaninga ngkana ko a tia n anganaki taiani kauring, ao ane ko na kubanako ni kunea b'a ngaia ko a tia n rangi n raroa nako.

²Ngkana e tautaekana te botannaomata te eti, ao a na bane ni kukurei aomata; ao ngkana e tautaeka te kairua, ao a na bane ni kungkung aomata.

³Ngkana ko tangira te wanawana ao a na kukurei am karo, ma kaakawaraia aine aika a buakaka e na kabuai am b'ai ni kabane.

⁴E kakorakoraa te botannaomata te tia tautaeka ae e raoiroi; te tia tautaeka ae e butim'aai taiani baabakanikawai e boni karokoa te kangaanga.

⁵Bon akea manenan kamoamoaan temanna b'a kaanga ai aron kawenean te b'ainikam'ane.

⁶A na manga bon raweiko am bure, ma akana a maiuakina te raoiroi a na anene mani bootaki ni kukurei.

⁷E aki tabe te aomata ae e buakaka ni inaomataia aomata aika a maiu ni kainano, ma aomata aika a raoiroi a tabe iai.

⁸Kakanikoaia tem'angina boni kaanga te kia are e kaura te kaawa ae e buubura; kabonganaan te iangoraoi e konaa ni kanakoa uran te maraki n nano.

⁹Ko riai ni wanawana n aki katea te nanobaba i bukin te b'ai teuana. E na bon aki konaa n reke raun nanom, i bukina b'a te b'ai ae a na ti karaoia nanobaba a na tii kakanikoko ma n takaarua.

¹⁰E riiribaia aomata aika a raoiroi aika a maiuakina te eti te tia tiritiri.[43]

¹¹Tai riki b'a te nanobaba ni kakai un kamanenaa am iango raoi n taotaona nanom.

¹²E a tia ni uruia aroia ana mataniwi te tia tautaeka ae e ongongo n taiani kewe.

¹³A riai aika a maiu ni kainano ma ake a karawaawataia ni kabane ni mwiokoa te Atua i bukin te oota n tatabemaniia nako.

¹⁴A na tautaeka n aki toki uea aika a karaoa ae e riai nakoia aika a maiu ni kainano.

¹⁵Kaetiia am ataei, ao ane a na wanawana; ataei aika a aki konaa ni kairaki a bon kamamaaia tinaia.

¹⁶E rikirake te bure ngkana e tautaeka te aomata ae buakaka ma ane a na nooraki b'akaia irouia kaain te aba aika a kakaawakina te tua.

¹⁷Ane a na anganiko te rau ma te kukurei natim ngkana ko kaetiia.

¹⁸Ngkana akea ana kairiiri te Atua ao ane a na mauna nako tua ma kaetieti, ma e kakab'aiaia aomata nako aika a ongotaeka n ana tua.

¹⁹E ngae ngkana a wanawana taani m'akuri, ma e na bon m'aiti naba te taeka i bukin kaongotaekakiia.

²⁰E m'aiti riki te kaantaninga iroun te nanobaba nakon te aomata ae e taetae ma te aki iango.

²¹Ngkana kam angan ami toro b'aai ni kabane ake e tangiria ao a na kananokawakiko n te bong teuana.[44]

²²E na karikirakea te ngurengure ao ni kariki buure aika a bati te aomata ae e nanorieta.

²³E uota te kamamaaeaki te kainikatonga ae e bati; e karekea te neboaki te nanorinano.

²⁴Ngkana ko kariniko n te bure teuana ao ko a riki b'a te kairiribai ae e rangi ni buakaka, i bukina b'a ko aki konaa n taekina te kewe ngkana ko a tia ni berita.

²⁵Ko na tai b'aka nako nanon te b'ai ni kam'ane i bukin kibiubium onimakina te UEA, ao ko na maiu.

²⁶A m'aiti ake a kataia ni iraorao ma taan tautaeka, ma e roko te eti mairoun te UEA.

²⁷A kairiribai i marenaia aomata aika a raoiroi ma aomata aika taani bure.