Read Te B'aib'ara Taeka n Rabakau 3 Bible Online

Taeka n Rabakau 3 - Te B'aib'ara bible

Taeka n Rabakau 3

¹Natiu, uring au reirei ma au taeka ao iri nanoia ni kabane.

²A na bon buokiko ni waakin maium ao n anganiko te teetekeraoi.

³Ke e nooraki iroum n taai nako te tangira ma te kakaonimaki kaanga te m'ae n roroa, ao koroi inanom.

⁴E na tangiriko te Atua ma aomata ao a na atongko b'a ko tokanikai.

⁵Ko na onimakina te UEA ma nanom ni kabane ao tai onimakina ana babaaire nanom.

⁶Karikia n taai nako b'a te tia kairiko, ao e na kaitiaka te kawai b'a ko aonga n ri mwiina.

⁷Ko na tai iangoia n taai nako b'a ko rangi ni wanawana, ma ko na karinea te UEA ao kararoako man taian buakaka.

⁸E na kamarurungko te aro aei ao e na anganiko te korakora.

⁹Karinea te UEA n anganna am m'ane ao moan m'akoron uaan arokam ni kabane.

¹⁰Ao ane e na reke iroum taiani uita ma kureebe ae e m'aiti riki nakon ae ko kainanoia.

¹¹Natiu, ko na aki rairaki nako ke ni karikiko b'a baika a maai ngkana e boaiko te UEA.

¹²E boaiia ni kabane te UEA aomata aika e tangiriia, n ai aroia kaaro aika a boaiia natiia ae maamaten nanoia.

¹³E kakab'aiaia aomata ni kabane te Atua aika iai irouia te wanawana.

¹⁴E kakaawaki riki te wanawana nakon te tirewa; e na kakorakoraa kaub'aim riki nakon te koora.

¹⁵E kakaawaki riki te wanawana nakon te b'ai ni katamaroa ae e raoiroi; akea te b'ai ae ko tangiria ae e konaa ni kabotauaki ma ngaia.

¹⁶I nanon bain te wanawana are te atai e mena iai te maiu ae e anaanau ao ni baina are te maing bon taian kaub'ai ma taiani karineaki.

¹⁷E kakukureia te maiu te wanawana ao e kairiira ni kaawakiniira i aon kawaira.

¹⁸Bon te aroka ae e anga te maiu te wanawana, bon te tabo ike e nako mai iai te kukurei i bukiia ni kabane akana a taumatoaia.

¹⁹E karika karawa ma aonnaba te UEA n rabakauna ma wanawanana.

²⁰N ana ataib'ai e katabwena marawa are i karawa ao e kanakoa nangnikarau ao e kab'aka te karau.

²¹Natiu, kamanena am iango ao ana babaaire nanom ae e raoiroi! Kaawakinna inanom n taai nako.

²²A na bon buokiko ni kaanaanaua ma ni katamaroa maium.

²³Ko na nakonako raoi ao a na aki toki waem;

²⁴ko na motirawa ma te aki raraoma ao ko na matu raoi.

²⁵Ma ngaia ae, ko na aki maaku n taiani kabuanib'ai aika a karina ke taian angibuaka aika a na oroia aika a buakaka.

²⁶Ko na bon kakoaua b'a e na bon kaawakiniko te UEA man taian kabuanib'ai.

²⁷Ko na karaoi b'aai ni kabane ane ko konaa ni karaoia nakoia aomata nako akana a kainanoa am buobuoki.

²⁸Ko na aki tuanga kaain rarikim b'a e na manga oki nakon te ingabong, ngkana ko konaa ni buokia n te bong aei.

²⁹Ko na aki kataia ni kakeaa bonganam nakoia kaain rarikim aika a onimakiniko.

³⁰Ko na aki ngurengure ti i bukin te kan ngurengure ngkana ko bon aki maraki.

³¹Ko na aki mataaiakiniia aomata aika a iowawa ke ni katotongia aroia.

³²E aki tangiriia aomata te UEA aika a karaoa ae e buakaka, ma e karikiia aomata aika raoiroi b'a raaraona.

³³E kab'aka te karereanti i aon mwengaia aomata nako aika a buakaka, ma e kakab'aiai mwengaia aomata ni kabane aika a raoiroi.

³⁴E kaenaena te UEA nakoia akana a kaenaena naba, ma e akoia ni kabane aika a nanorinano.

³⁵Kam na neboaki ngkana kam rabakau ma kam na kamamaaeaki ngkana kam nanobaba man taningabono.