Read Te B'aib'ara Taeka n Rabakau 4 Bible Online

Taeka n Rabakau 4 - Te B'aib'ara bible

Taeka n Rabakau 4

¹Natiu, kakaauongo raoi nakon au reirei ao reireiniko te iangoraoi.

²A rangi ni boongana au reirei, ma ngaia ae, ko na aki tannako.

³Ngke I uarereke ngkoa man rangi n taatangiraki iroun tinau ao e taku

⁴tamau nako iu: “Ngkana ko karaoa are I reireiniko ma ni kaawakin inanom, ao ko na maiu.

⁵Ko na wanawana ma n reireiniko te iangoraoi; ururing au reirei nako, ao karaoa ae I tuangko.

⁶Ngkana ko tangira te wanawana ao ko na aki kaaki taekana, e na bon tararuaiko.

⁷Te kabanea n tamaroa i bukin te Wanawana bon te Wanawana n ti ngaia; e rangi n tamaroa riki te iangoraoi nakon b'aai riki tabeua.

⁸Ngkana ko m'annanoa te Wanawana ma n baimatoaia, ao bon am b'ai te karineaki.

⁹E na riki b'a kaanga ai aron katokaan te baunuea ae e mimitong aika kaue aika a tamaroa.

¹⁰Natiu, ngkana ko kakauongo ma n ongotaeka nako au reirei, ao e na anaanau maium

¹¹I a tia ni kaota te kawai nakoim ae e na karekea am iango; I a tia ni kairiko i nanon te kawai ae e eti.

¹²E na bon aki tuukaki kawaim, ao e na bon aki toki waem ngkana ko biri.

¹³Baimatoa au reirei ao ko na aki kanakoi. E na bon anganiko kakaawakin te maiu aei.

¹⁴Ko na aki katotoong maiu aika a buakaka mairouia aomata aika a iowawa.

¹⁵Tannako mairouia ao waakina nako kawaim. Kararoako mairouia.

¹⁶A bon aki mamatu ke ni motirawa ni karokoa a tia ni karaoa te kaairua ke ni kamarakiia tabeman aika akea aia bure.

¹⁷Kanaia ma nimaia bon te tiritiri ma te iowawa.

¹⁸Katein maiuia aomata aika a raoiroi kaanga ai aron ootan taai n te kaarangaina are e tabe n rikirake ootana ni karokoa e a boni ngaina raoi.

¹⁹Katein maiuia aomata aika a buakaka kaanga ai aron te rotongitong ae e korakora, ao a na bon aki konaa n ataia b'a tera ae e toki waeia iai.

²⁰Natiu, kakauongo raoi nakon te b'ai ae I taekinna.

²¹Ko na aki m'aninga naba au taeka teuana, ma kam na iaiangoi ni kabane.

²²Ataakin taian reirei aikai e na bon anganiko te maiu ni koaua ao te marurung ae e raoiroi.

²³Karaua raoi kaawakin am iango b'a bon anne boton te maiu ni koaua.

²⁴Ko na aki tataekina te kewe ke n taetae ni kam'anea temanna n te b'ai ae ko taekinna.

²⁵Kaeta matam n taraa moam, ao tai rairaira atuum

²⁶Ko riai n ataa te tabo ane ko kainetia ke ko riai n tiku n te tano ae e matoa.

²⁷Ko na tai karekeko n te kaairua n rairaki nakon te atai ke te maing.