Read Te B'aib'ara Taeka n Rabakau 6 Bible Online

Taeka n Rabakau 6 - Te B'aib'ara bible

Taeka n Rabakau 6

¹Natiu, iangoia b'a aongkoa ko kukurei ni kabooa baen temanna, ae e aki konaa ni kab'araa ana roun.

²Ao i mwiina, ko a m'ane ni bon oin am taeka,

³ao ko a mena ngkai i aani m'aakan temanna. Aio te b'ai ae ko na karaoia: Ko na nako ni buubuti kariaiakam b'a ko na kamaunaa te boraraoi.

⁴Ko na riai ni karaoa aei i m'aain matuum ke e ngae ngkana ko a rangi ni kani matu.

⁵Kamaiuko i bon iroum, n ai aron te ria ke te mannikiba ae e kataia ni birinako mairoun te tia kaeman.

⁶Kam konaa ngkami aika kam taningaroti n reireingkami man aron maiua taiani kinnongo.

⁷Bon akea aia tia kairiiri taiani kinnongo,

⁸ma a kaawakina te am'arake i nanon tain te bongi n tai.

⁹Tao maanra ngkami ni wene ikanne ao akea te b'ai ae kam karaoia? N ningai te tai ae kam na teirake iai mani katoka matuumi?

¹⁰Matu teutana. Kibarake teutana. Booti baimi ao ni kamatuui baimi.

¹¹Ni karokoa a karina ni bua b'aai nako, kaanga ai aron ae e a tia n anaaki iroun te tia kimoa ae e uab'ai n tiritiri.

¹²A rerebaua taani kewe n aki akaaka

¹³ni mamataukiro man anga aia kanikina ni keweia tabem'aang.

¹⁴A aki toki n iaiangoi baika a kam'araa ma ni buakaka, ao a karikirakei taian kiriwe.

¹⁵Ma ane a na oreaki n taian kabuanib'ai aika a karina ao ane a na tiku n akea aia kaantaninga.

¹⁶Bon iai onoua ke itiua aekakiia aomata aika e ribaia te UEA:

¹⁷Aomata aika a kainikatonga ke ni b'anga ni kewe ke n tiriaomata,

¹⁸aomata aika a babaairei waaki aika a buakaka ke a biri m'aaka nakon karaoan ae e bure,

¹⁹aomata aika a b'anga ni kewe n te kabowi ke a kaakariki taian kiriwe n te utu.

²⁰Ongotaeka nakon taian reirei mairouia ami karo

²¹kaawakinna n taai nako inanom ao tai m'aninga taekana.

²²A na kaiririko aia reirei ngkana ko nakonako, a na kaawakiniko ngkana ko matu, ao a na taetae nakoim ngkana ko uti.

²³Bon te taura ana Tua te UEA, ao e oota n raaitiiti ana reirei. Te kaetaki ma tauan aromi i bon iroum boni ngaia are e na kairiko nakon te maiu.

²⁴A na bon kaawakiniko man taian taeka ni karang mairoun buun temanna. [6]

²⁵E na aki anaaki nanom n ana kab'akab'aka ke ni maata aika a kan tangiraki mairoun temanna ae ai aron anne.

²⁶Te aine ae e kabooa nako ana tangira e konaa ni kabooaki n ae e rangi ni uarereke ae kaanga boon te iriko. Ma te kareke tangira ma buun te m'aane temanna e na bon anai b'aai ni kabane mairoum.

²⁷Ngkana ko uouota te kooro ae e ura, ao ane e na kabuoka kunnikaim;

²⁸ma ngkana ko toua te kooro ae e kabuebue, ao ane e na bue waem.

²⁹Ao ngkana ko nako ni matu ma buun te m'aane temanna, ao ko na bon anaa uaana.

³⁰Tiaki rereitaki ma taani kimoa, ao tiaki naba [7] ma temanna are kimoa te b'ai teuana b'a e na kanna.

³¹A na bon anaa uaan aia m'akuri taani kimoa akana a reke itiua te tai m'aitin te b'ai are a kimoaia ao a na akea nikiran aia b'ai nako.

³²Ma ngkana ko matu ma buun te m'aane temanna, ao ko na bon uruana arom ni uaan am nanobaba.

³³Ko na oreaki ma ni kab'ainrangaki n taai nako,

³⁴i bukina b'a te bu are e a kookoo e na konaa n rangi n un ao n akea ana nanoanga ngkana e kaoka kaina.

³⁵E na bon aki manga tangiria b'a kam na kabooa mwiina n te b'ai teuana, e na bon aki tabe ma ami angab'ai nakoina.