Read Te B'aib'ara Taeka n Rabakau 8 Bible Online

Taeka n Rabakau 8 - Te B'aib'ara bible

Taeka n Rabakau 8

¹E weewete te wanawana, [9] ri nanon te ataib'ai ae e rangi ni korakora.

²Ngke e tei n te tuuta ni kawai ao i aon taian tabuki.

³E tei i rarikin mataroan te kaawa ike a rinrin iai aomata nakon te kaawa, ao e takaarua ni kaangai;

⁴“I weeweteingkami n tatabemaningkami nako!

⁵Te iangoraoi ma ana babaaire te nano ana konaa n riki b'a am b'ai.

⁶Ongora, b'a a rangi ni boongana b'aai aika I taekin.

⁷I aki toki n tataekina te koaua ao I aki kan taekina te kewe.

⁸A bane n raoiroi baika I taekin, bon akea teuana mai buakoia ae e na kaairua ke na kam'aam'ane.

⁹“Ngkana iai iroumi te ataib'ai, ao ane kam na noori au taeka b'a boni b'aai raoi aika kam kainanoi.

¹⁰Ke a riki taian reirei ma taian rabakau b'a baika a uaana riki nakoim nakon te koora ae te kabanea n itiaki ke te tirewa.

¹¹E kakaawaki riki te wanawana nakon te b'ai ni katamaroa ae e raoiroi ke b'aai nako aika a tangiraki.”

¹²Bon te Wanawana [10] ngai bon raoraou ni koaua te iangoraoi; Au b'ai te rabakau ao te motikitaeka ae e raoiroi.

¹³Ngkana ko karinea te UEA, ao ko na ribaa te buakaka. I ribaa te kamoamoa ao te kainikatonga ao te kewe ni kam'aam'ane.

¹⁴I korakora ao I anga te taeka n reirei ao te motiraoi.

¹⁵A kairiiri taiani uea ni m'aakau ao a karaoi taian tua taan tautaeka aika a eti.

¹⁶A bane n tautaeka taani kairiiri aika a raoiroi i aan au buobuoki.

¹⁷I tangiriia aomata ni kabane aika a tangirai, ao n na boni kuneaki irouia ni kabane akana ukoukorai ma te nano ni koaua.

¹⁸I konaa ni karikiko b'a te kaub'ai ma n rangi ni kinaaki, mani kakannato ao n teetekeraoi.

¹⁹E rangi ni kakaawaki te b'ai ae ko karekea mairou nakon naba te koora ae te kabanea n raoiroi te tirewa ae te kabanea n itiaki.

²⁰I aki toki ni kaakaraoa te raoiroi,

²¹ao I anga taiani kaub'ai aika a korakora nakoia ni kabane aika a tangirai.

²²E karikai moa te UEA i m'aain b'aai nako, ana moan m'akuri, ni boong ake ngkoa.

²³I karikaki ngke e moan karikaki b'aai, i m'aain rikin te aonnaba, i m'aain b'aai nako.

²⁴Ngke I bungiaki, bon akea marawa ke taian koburake n ran.

²⁵I bungiaki i m'aain rikin taiani maunga ke katukan taian tabuki ni nneia.

²⁶E riki aei i m'aain ae e karaoa te aonnaba te Atua ke ana katawanang nako ke taian tanobon.

²⁷I mena ikekei ngke e katikui taiani karawa te UEA ni nneia ma n taakina nako karawa i aon taari.

²⁸Bon raou ngke e katikui taian nang i karawa ao e kariki taiani koburake n ran ake a kanoaa marawa.

²⁹I mena ikekei ngke e kawenea tian taari b'a e na ongotaeka i rouna, ao ngke e kawenei taian aana ake a na bakatokoa te aonnaba.

³⁰I boni mena raoi i rarikin te UEA ma ni buokia ni baairei mani karaob'ai.[11] I kakukureia ni katoa bong, ao I kukurei ngke I mena i rarikina.

³¹I rangi ni kukurei n te aonnaba aei ao I kukurei naba irouia ana aomata.

³²Ongora raoi irou, natiu! Iri nanon au taeka n reirei ao ane kam na kukurei.

³³Kakauongo raoi nakon au reirei nako, ao ane kam na wanawana.

³⁴Nakomai nakon au auti ni katoa bong ao ongora irou. Ao ane kam na kunea te kukurei.

³⁵Ngkana kam kuneai ao kam na kunea naba te maiu, ao ane e na kukurei te UEA iroum.

³⁶Ma ngkana kam aki kuneai, ao kam bon kammarakiko i bon iroum, ao ngkana ko ribaai, ao kam tangira te mate.