Read Te B'aib'ara Te Minita 1 Bible Online

Te Minita 1 - Te B'aib'ara bible

Te Minita 1

¹Ngke e uea natin Tawita i aon Ierutarem, ae e ataaki b'a e rangi ni wanawana, [1] ao e taku:

²Akea nanoni b'aai nako! A bane n akea nanoia. I a tia n noori ni kabane akea nanoni b'aai nako!

³Tera ae ti na kaotia ikekei ni mwiin ara m'akuri korakora i aon te aba aei?

⁴A roko aomata ao a nako, ma e bon aki bitaki te aonnaba.

⁵E oti taai ao e bung taai, ao e kawaekoaa nako ike e oti mai iai.

⁶E uki te ang nakoaiaki, e uki te ang nakoiang; ao e bibitaki unna ao e teimatoa n arona anne.

⁷A raanga karaanga nako taari, ma e tuai man taonako. A manga raanga naba, ma a na bon roko naba ni nneia.[2]

⁸A kabotu kanoan te maiu ni kabane a ri aon ae e konaa n taekinaki. A aki konaa n rauaki matara ma taningara ni b'aai aika ti noori ma n ongo.

⁹B'aai ni kabane aika a riki a bon tia n riki naba mai m'aaina; akea te b'ai ae e boou, akea i aan taai.

¹⁰E na taetae temanna ni kaangai, “Aio te b'ai ae e boou!” Ma e a kaman riki naba anne ngkoa, n te tai ae e rangi ni maan i m'aain bungiakira.

¹¹Bon akea temanna ae e maiu ngkoa ae e teimatoa ururingana, ao ti te arona naba ma aika a na manga bungiaki akea temanna ae na ururingaki i buakoia.

¹²I taekin baikai ngke I maeka i Ierutarem b'a uean Iteraera.

¹³Ni kabanean wanawanau, ao I kataia ni kakaaei nanon b'aai aika a riki n te aonnaba aei. Ao te Atua e a tia ni kamatoatoaa nakoira karaoan aei.

¹⁴I a tia n noori b'aai ni kabane, ao akea nanoni iango ni kabane b'a kaanga ti kaean te ang. [3]

¹⁵Ngkana e b'aoua te b'ai teuana, e bon aki konaa ni manga kaetaki; ngkana akea rab'atan te b'ai teuana, ao e bon aki konaa ni warekaki.

¹⁶I taku nako iu “Bon ngkoe te kabanea ni wanawana nakoia aika a tia ni maeka i aon Ierutarem. E korakora nanom ni kan atai b'aai nako, ao ko a tia ni karekea am atatai ae e rangi ni m'aiti.”

¹⁷Ao i mwiina, I a iangoia b'a N na kakaaea taekan te wanawana ma te nanobaba. Ao i mwiina, I a kunea b'a ngaia bon iango aika akea nanoia aika kaanga kakiokioan te ang. [4]

¹⁸M'aitin rabakaum boni m'aitin marakim; m'aitin am ataib'ai, boni m'aitin korakaim.