Read Te B'aib'ara Te Minita 10 Bible Online

Te Minita 10 - Te B'aib'ara bible

Te Minita 10

¹E kaboiraaea ana kabira te tia motiboi naango tabeman aika a mate i nanon te kabira, ao e kabuakaka te wanawana ae e m'aiti te nanobaba ae ti teutana.

²E kairiko te iango raoi nakoni karaoan te raoiroi; ao e kairiko te iango n nanobaba nakoni karaoan te kaairua.

³A kaoti nanorooia aomata aika a nanobaba n aroia ni maeka; e rang ni beebete kinakiia b'a akea kanoan aia iango.

⁴Tai kaaki am m'akuri ngkana e un am mataniwi. E na kab'araaki am bure ngkana ko tiku n aki kakarongoa.

⁵B'aai tabeua aika a karaoaki irouia taan tautaeka a aki raraoi:

⁶a karineia aika a nanobaba, ao a aki karineia aika a kaub'ai;

⁷a kariaiakaki tooro b'a a na toka i aoia aoti; ao a kairoroia aia toka tooro b'a a na nakonako i aoni waeia.

⁸Ko na manga boni b'aka i nanon te m'arua ae ko boni kenna; e na tenaiko te naeta, ngkana ko urua te oo. [22]

⁹Ko na boni konaa naba ni ikoaki ngkana ko korokoroi taian atiibu ke ngkana ko korokai.

¹⁰E na boni kangaanga kabonganaan am tanai ngkana ko aki taimma; ngkana ko tim'aati, ao ko na bon ataa te b'ai ae ko na karaoia.

¹¹E aki manena te m'aaka nakoim i bukin kamananaan te naeta ngkana e bon tenaiko naba.

¹²A na reke raraom, ngkana ko taetae ni iango raoi; ao ngkana ko taetae n nanobaba ao ko bon tiringko iai i bon iroum.

¹³A moana aia waaki nanobaba man te aki iango raoi, ao e toki nanorooia n te kabuanib'ai.

¹⁴A aki konaa ni b'ara riaia, ma bon akea mai buakora ae e ataia b'a tera kanoan boong aika a na roko.

¹⁵A aki ataa mateia ni m'akuri aomata aika a nanobaba a bon aki ataa naba kawaia n okiri mwengaia.

¹⁶E na bon reke n te kangaanga te aba ngkana e baabakanataei ana tia tautaeka ao ana taani kairiiri a bobotaki ni kukurei ni katoa bong.

¹⁷Ma e na teetekeraoi te botannaomata ngkana e nanonim'aane ana tia tautaeka, ao a aki kabanei aia tai ana taani kairiiri ni kabatia te bobotaki ni kukurei.

¹⁸Iai tabeman aomata aika a rangi n taningaroti naba ni bonobonota raranin raun aia auti ni karokoa ae a obonako kaina ao ni b'aka.

¹⁹Ko na kukurei n te am'aam'arake ao te momooi, ao e konaa ni kabooi b'aai ni kabane aika ko tangiri te kamaraato.

²⁰Ko na tai iaiangoa naba kamaraiaan te uea; ao tai kamaraiaa te aomata ae e kaub'ai, ko na aki naba n te aro ni karaba. B'a ane e na ongo te mannikiba ae e uarereke ao e na taekin b'aai ni kabane.