Read Te B'aib'ara Te Minita 2 Bible Online

Te Minita 2 - Te B'aib'ara bible

Te Minita 2

¹I taku nako iu, “Kakukureiko, kamaiua nanom!” Ma bon akea nanon te iango aei.

²Te ngarengare ao te kakukurei bon te m'akuri ni burababa. B'a tera te raoiroi ae e na karaoia?

³I kani kakaaea b'a tera te kabanea n raoiroi i bukira n te tai ae e uarereke aei i aon te aonnaba. Ma ngaia are, I iangoia b'a N na kakukureiai n te wain, ao ni kakaaea b'a tera nanon te riki n nanobaba, ngkana I bon aki nanobaba raoi.

⁴I karaoi b'aai aika a ab'ab'aki. I katei taian auti ao I uniki nne n aroka ni kureebe aika a m'aiti.

⁵Iai au onaroka ni uee aika a m'aiti, ao onaroka ni uanikai aika a m'aiti aika a onrake ni kaai aika a uaa.

⁶A m'aiti au tabo n ran aika I konaa n anaa te ran iai i bukin tebokan aroka.

⁷Iai au toro, ao a manga riki natiia m'aane ma natiia aine b'a au toro naba. A m'aiti riki au tiibu ma au kooti nakoia aomata nako aika a tia ni maeka i aon Ierutarem.

⁸Taan tautaeka mai abatera a uoti nako iu tirewa, koora, ao kaub'ai aika a tamaroa. A uouoai ao n aneneai m'aane ma aine, ao a m'aiti buu [5] aika taan anganai te kakukurei ae e bati.

⁹Boni ngai te kabanea n tanoata taekau mai buakoia aomata nako aika a tia ni maeka i aon Ierutarem, ao I bon rangi ni wanawana.

¹⁰A reke irou b'aai ni kabane aika I tangiri ao I karaoi b'aai nako aika I kani karaoi ni kakukureiai. Ma I rangi ni kim'areirei riki n au m'akuri.

¹¹Ao i mwiina, I a iangoi b'aai aika I a tia ni karaoi, ni ikotaki ma m'akuri aika a matoatoa, ao ngaia bon ti kakiokioan te ang. [6] Bon akea nanoni b'aai ni kabane.

¹²I titirakinai ni kaangai, “Tera ae I tuai ni karaoia ae e na karaoia te uea ae e na onea mwiiu?” Ao i mwiina, I a iangoia b'a N na kabotaua te wanawana ma te nanobaba ao te nanoroo.

¹³Ao I kunea b'a e raoiroi riki te wanawana nakon te nanobaba, kaanga ai aron te oota ae e raoiroi riki nakon te roo.

¹⁴Maata aika uoua aika a raraoi kaanga ai aron te wanawana; ao te nanobaba e katikuko i nanon te roo. Te wanawana ke te nanobaba, ma ti te bo tokira.

¹⁵N tokina, I taku nako iu, “Te wanawana e uotai nakon te akea! Bon ti te bo naba are e riki irou, ma are e riki iroun te nanobaba. Bon akea nanoni b'aai nako.

¹⁶Ti wanawana ke ti nanobaba, ti na boni bane naba ni mate ma ni m'aninga te aba taekara.”

¹⁷Bon aio te b'ai ae I ribaa iai te maiu. A bane ni kammaraki b'aai nako aika ti karaoi, bon te iango ae akea nanona b'a kaanga ti kakiokioan te ang. [7]

¹⁸Ao I a tib'a ataia b'a ngaia n te tai teuana, ao ane a na reke b'aai ni kabane ake I karaoi n te m'akuri ae e korakora iroun te aomata temanna. Ma ngaia are, I a moana ribaakin b'aai ni kabane.

¹⁹Antai ae e ataia b'a a iangoraoi te koraki aikai, ke a nanoroo? E ngae ngke iangoraoi, ke e nanoroo ma N na boni b'aini b'aai ni kabane aika I a tia ni karekei n au m'akuri korakora ao wanawanau. Bon akea nanona.

²⁰I iangoa mwiin au m'akuri korakora, ao e taonai te b'arannano.

²¹Ngkana ti kamanenai wanawanara, rabakaura, ao ara ataib'ai i bukin karekean ara b'ai, ao e aera b'a ti na manga katikui nakon temanna ae e bon aki m'akuri i bukin karekeaia? Bon akea nanon te iango aei, ao e kaairua.

²²Tera te b'ai ae ti karekea man ara m'akuri korakora?

²³E kainano rab'atara i nanon te ngaina, ao e kamaraki te m'akuri. Ao n te tairiki e aki rau ara iango. Bon akea nanona.

²⁴Ti te b'ai ae te kabanea n tamaroa, ti riai ni kukurei n am'aam'arake, ni momooi, ao ni m'akuri. I kakoauaa b'a bon aikai ana b'aintangira te Atua nakoira,

²⁵ao bon akea ae e kukurei riki n am'aam'arake ma ni maiu riki nakon ae I karaoia.

²⁶Ngkana ti kakukureia te Atua, ao e na kawanawanaira, ma n anganiira te ataib'ai ao te kukurei. Ma ngkana ti bure, ao te Atua e na karawaawatai maiura, ao e na manga anga ara b'ai ni kabane nakon temanna are E kakukureia. Bon akea okoron aei ma kakiokioan te ang.[8]