Read Te B'aib'ara Te Minita 3 Bible Online

Te Minita 3 - Te B'aib'ara bible

Te Minita 3

¹Bon iai tain b'aai ni kabane i aon te aonnaba aei ao iai naba taian tai.

²Iai te tai i bukin te bungiaki ao te mate, te tai n ununiki ao te tai ni bobooti uaa,

³te tai n tiritiri ao te tai ni kakamaiu, te tai n urub'ai ao te tai ni kateib'ai,

⁴te tai n tang ao te tai ni ngare, te tai n nanokawaki ao te tai ni kukurei,

⁵te tai n tewenakoi atiibu ao te tai ni ikoikoti atiibu, te tai ni inga ao te tai ni maaenako.

⁶Iai te tai ni kunei b'aai ao te tai ni kabuab'ai, te tai ni kaawakinib'ai ao te tai n angaanga,

⁷te tai n raeuai b'aai ao te tai n ituui b'aai, te tai ni kakauongo ao te tai n taetae.

⁸Bon iai naba te tai i bukin te tangira ao te riribai, te buaka ao te raoi.

⁹Tera te b'ai ae ti karekea man ara m'akuri korakora?

¹⁰I a tia n noori b'aai aika a kaangaanga aika e tangiri te Atua b'a ti na karaoia.

¹¹E kariki b'aai te Atua n taia aika a riai. Ma bon akea temanna mairoura ae e ataa raoi te b'ai ae E a tia ni karaoia, ao E katikui inanora taian titiraki i bukin boong aika a tia n nako, ao boong aika a na roko.

¹²I ataa te b'ai ae moan te raoiroi ae ti konaa ni karaoia b'a ti na kukurei iai n taai nako n te maiu,

¹³i bukina ngke ana B'aintituaraoi te Atua nakoira bon te kukurei ae ti karekea man te am'arake, te mooi, ao man te m'akuri are ti karaoia.

¹⁴A na bane n akea tokini b'aai ni kabane aika e karaoi te Atua, akea te b'ai ae E karaoia ae e na manga bitaki. E a tia ni karaoi b'aai aikai ni kabane te Atua, b'a ti aonga n taromauriia.

¹⁵B'aai ni kabane aika a riki a tia n riki mai m'aaina, ao aika a na manga riki a tia naba n riki. E karaoi b'aai ni kabane te Atua ni kaokioki n aron anne.

¹⁶I noora te waaki ae e buakaka, ao ae e aki eti n taabo nako n te aonnaba n onea mwiin te waaki ae e raoiroi ao ae e eti.

¹⁷Ma ngaia are, I taku nako iu b'a e a tia te Atua ni kotea te tai ao te tabo i bukin b'aai nako. E na boni motikitaekaia aomata nako aika a buakaka, ao aika a raoiroi.

¹⁸I ataia b'a e kataira te Atua ngkai e kaotia b'a bon taiani man ngaira.

¹⁹Ti ikeike ao ti mate n ai aroia maan, ao ti aki raoiroi riki nakoia. Bon ti te b'ai ae akea nanona.

²⁰A bane n nako b'aai aika a maiu nakon te tabo ae ti teuana. Ti riki man te tano, ao ti na manga okira te tano.

²¹Antai ae e ataia raoi b'a a bon waerake tamneira, ao tamneia maan a ruo nako nanon te tano?

²²Ti bon nanonaki b'a ti na kukurei n ara m'akuri, ao bon anne te b'ai ae ti konaa ni karaoia. Ti bon aki konaa n atai boong aika a na roko.