Read Te B'aib'ara Te Minita 4 Bible Online

Te Minita 4 - Te B'aib'ara bible

Te Minita 4

¹I a manga taratara nako riki, ao I nooriia aomata aika a karaoaki ae a aki riai nakoia ni kabutaa te aonnaba. A tang, ma bon akea temanna i rarikiia ae e kona n anga te karaunano nakoia, ao te koraki ake a karaoa ae e aki raoiroi nakoia bon aomata aika iai te m'aaka irouia.

²I taku inanou, “A raoiroi riki aika a mate nakoia aika a maiu.

³Ma a kab'aia riki akana a tuai ni bungiaki nakoia aomata ni kabane, i bukina b'a a aki te roko n noori baika a buakaka aika a riki n te aonnaba aei.”

⁴Ao i mwiina, I a tib'a ataia b'a ti m'akuri ma ni karaoi baika a raoiroi, i bukina ngke ti bakantang irouia tem'angina. Bon akea nanon riki te baei b'a bon ti kakiokioan te ang. [9]

⁵A na mate n te baki aomata aika a nanobaba aika a rukum baaia.

⁶Ma e raoiroi riki te am'arake ae e uarereke ae e kanaki ma te rau nakon ae e uoua te tai okiokin are e reke mani mwiin te m'akuri ni kab'akanako tai ao bon kakiokioan te ang.[10]

⁷Ao I a manga nooria naba b'a bon akea nanon b'aai ni kabane n te aonnaba aei.

⁸N aron aei, iai tabeman aomata aika akea raoraoia ke aia utu. Ma a bon aki konaa n rauaki ni b'aai ake a b'ain, ao a aki konaa n toki aia m'akuri i bukin karekean riki tabeua. A riai n titirakiniia i bon irouia ni kaangai, “E aera ngkai e aki konaa n toki au m'akuri i bukin karekean riki au b'ai? Antai ae e na b'ain ngkana I kiitan?” Bon te iango ae akea nanona, ao te maiu ae e karawaawata!

⁹E raoiroi riki ngkana iai raoraom nakon ae ko na tiku n ti ngkoe, b'a ane e na raka riki iai kukureim ni b'aai aika kam karekei.

¹⁰E na konaa ni kateirakeko raoraom ngkana ko b'aka. Ma ngkana ko b'aka ao akea raoraom i rarikim, ao ko a reke n te kaangaanga.

¹¹Ngkana ko matu n ti ngkoe, ao bon akea ae e na kaabueeko n te tairiki ae e kam'aitoro.

¹²E konaa te aomata n orea temanna mai buakomi, ma e aki konaa n oroingkami ni kauoman. N aron are e taekinaki ni kaangai, “E aki konaa ni moti te roobu ae te bibiritennai.”

¹³Ko konaa n rangi n ataei ma ni maiu ni kainano. Ma ngkana ko wanawana, ao ko raoiroi riki nakon te uea ae e nanobaba, ae e aki kan ongo n taeka n reirei.

¹⁴E ngae ngkana tao ko aki bungiaki n te utu ni uea, ke n tia n riki b'a te bure, ke tao ni maiu ni kainano, ma ko boni konaa naba n riki b'a te uea.

¹⁵Ao n te taina, ao I nooriia aomata ni kabane b'a a ira te tia kairiiri ae te rorobuaka n ataei, ae e kairiiri ngke e a tia n nako te uea.

¹⁶A bon aki konaa ni warekaki m'aitiia aomata ake a iria. Ma tabeua te ririki mangkai, ao bon akea naba temanna ae e na neboia, bon akea nanon te baei b'a boni kakiokioan te ang. [11]